Седум часа се дискутираше за Северна Македонија на Самитот во Брисел, откри вечерва техничкиот преговарач со ЕУ и претседател на Комисијата за европски прашања на СДСМ, Бојан Маричиќ, во Топ Тема на Телма во дебатата со Тимчо Муцунски, меѓународниот секретар на ВМРО-ДПМНЕ.
Маричиќ истакна дека огромен број на земји членки на сериозно ниво го држат проширувањето на ЕУ, која е една од поуспешните политики на Европската Унија и тоа дава за право да се каже дека државата ќе ги започне преговорите.
– Неблагодарно е ВМРО-ДПМНЕ да зборува за недоволно дипломатски активности на Владата. Кога последен пат пред 2017 СДСМ беше на власт до 2006 година, Северна Македонија беше во група со Хрватска, кандидатски статус добивме во 2005 и потоа патот застана. Имавме речиси 11 години застој, заради ВМРО-ДПМНЕ, еве нека е од 2009 година, значи 7-8 години застој во кои нѐ престасаа и Хрватска и Србија и Црна Гора. Затоа сме денес во групата со Албанија, поентираше Маричиќ.
На прашањето зошто ВМРО-ДПМНЕ не се согласи на брзи предвремени парламентарни избори, Муцунски рече дека причината е „законската обврска“ за 100 дена техничка влада. Маричиќ го потсети Муцунски дека техничката влада со учество на СДСМ траеше 45 дена, на што Муцунски немаше одговор. Тој ја пренасочи дискусијата. „Безбедносниот апарат е политизиран“ – рече Муцунски.
– Девет месеци водевме преговори со ВМРО-ДПМНЕ за законот за СЈО. Тие направија сѐ што можеа СЈО да дојде во оваа ситуација во која се наоѓа. ВМРО-ДПМНЕ направи сѐ да истече законскиот рок и таа институција да биде во ова ситуација. И тоа е многу легитимно, прво, половина или дел од нивната делегација беше директно засегната со случаите на СЈО, а другиот, поголем дел од делегацијата, беа адвокати коишто ги застапуваат нивните луѓе во случаите од СЈО. „Секој ден, цело лето имате соопштенија за тоа дека треба некој да оди во притвор, а воедно да се пуштат од притвор вашите луѓе“ – потенцира Маричиќ.
– Сѐ уште луѓето ги чувствуваат последиците од владеењето на ВМРО-ДПМНЕ. За 11 години нѐ скара со сите. А дома, имаме рекорден раст во платите. Подобро е да се креваат платите, отколку да се креваат споменици. Изборот е дали да се градат градинки или споменици, меѓу нормални патишта и патишта со провизии и бандери на патот – рече Маричиќ.
Муцунски, во последните минути, кога водителот Христов побара да упатат завршни пораки, рече: „Се надевам дека контролниот механизам за лажните вести ќе почне да важи и за претставниците на власта“, веројатно ненамерно признавајќи дека продуценти на лажните вести веќе се наоѓаат во редовите на неговата партија.
„Силеџиството во парламентот е специјалитет на ВМРО-ДПМНЕ“ – е една од поентите во последните минути од дебатата меѓу Маричиќ и Муцунски во емисијата Топ Тема што ја водеше новинарот Боби Христов.
Ј. Ѓ.
