Вилма Рускоска, шефицата на Основното јавно Обвинителство за гонење организиран криминал и корупција, вчера преку полномошник доставила опомена пред тужба за клевета, наменета до Коалицијата предводена од ВМРО-ДПМНЕ и се однесува на дел од содржината на изборниот спот на опозиската коалиција, насловен како „Криминална приказна“.
Денес, на социјалните мрежи на ВМРО-ДПМНЕ се појави нов предизборен спот, повторно, со навредлива содржина за Рускоска, во кој се инсинуира за нејзина соработка со владеачката партија.
Во предизборниот спот насловен како „Криминална приказна“ се споменува нејзиното име, во навредлива конотација која инсинуира корупција и поврзаност со Социјалдемократскиот сојуз, но во новиот спот ВМРО-ДПМНЕ отишле еден чекор подалеку, со тоа што нејзиниот, и ликот на Добрила Кацарска се појавуваат на картонски фигури, прегрнати со глумец кој треба да го претставува Заев, со што повторно се инсинуира на корупција и соработка помеѓу Обвинителството и Социјалдемкотраскиот сојуз.
За опомената пред тужба за првиот предизборен спот, Рускоска образложи за ДВ дека никогаш не дозволила политиката да влијае на нејзините одлуки, и дека категорично одбива да ја поврзуваат со која било политичка партија и да биде злоупотребувана вo политички спотови.
„Јас како обвинител повеќе од 23 години, во сите предмети по кои сум постапувала сум се водела исклучиво по Закон и доказите кои сум успеала да ги обезбедам. Сакам да потенцирам дека никогаш не сум дозволувала политиката да влијае на моите одлуки. Политичарите се менлива категорија, а ние обвинителите треба нашата функција да ја извршуваме најпрофесионално, законито и според доказите кои сме успеале да ги обезбедиме. Впрочем, и затоа граѓаните не плаќаат.
Oд овие причини, одбивам да ме поврзуваат со која било политичка партија и да бидам злоупотребувана вo политички спотови. Не сум член на ниту една политичка партија, нешто што може многу лесно да се провери. Дотолку повеќе, што јас сум единствениот обвинител од осамостојувањето на Македонија, што има поднесено oбвинение против потпретседател на Собрание од редовите на, тогаш владејачката партија, СДСМ“, вели Русковска за ДВ.
Во опомената доставена до Коалицијата предводена од ВМРО-ДПМНЕ, се бара извинување до обвинителката, толку пати колку што и спотот бил емитуван на секоја од телевизиите.
Доколку тоа не се случи, ќе биде поднесена тужба пред граѓански суд.
За новиот спот Рускоска сè уште нема официјална изјава, но на социјалната мрежа Твитер се појави аудио снимка од Кацарска, во која таа вели дека не е изненадена бидејќи не е првпат нејзиното име да се споменува во негативните кампањи на ДПМНЕ, но дека Мицкоски треба да биде свесен дека ваквите спотови прават повеќе штета за нив, и дека со ова се докажува дека ги злоупотребуваат државните пари обезбедени за финансирање на предизборните кампањи, со тоа што наместо да ги промовираат своите кандидати и агенди, тие водат негативни и црни кампањи.
Дробење. 👊 pic.twitter.com/yxt9WwiJJD
— Мијакот 🇲🇰 🇺🇲 (@Mijakott) July 4, 2020
Таа вели дека нејзината работа е оценета од Стејт Департментот, Европската унија, и ОБСЕ, и дека со ваквата кампања Мицкоски докажува дека не е за борба против организираниот криминал и корупција, и дека како кандидат за премиер јасно покажува дека ќе го штити криминалот и ќе поддржува судии кои ќе работат спротивно на законот.
Кацарска во аудио снимката јасно го повикува Мицкоски да каже дали поддржува судии кои чесно и со интегритет ја работат својата работа, или судии кои ќе работат спротивно на законот.
И. Е.
