истражува: тимот на ФРОНТЛАЈН
Како главен играч во скандалот со црните пари од Унгарија, а користени за македонски медиуми, може да се посочи Петер Шац од Будимпешта. Пред две и пол години неговото име се појави во Централниот регистар на компании, како еден од сопствениците на телевизија Алфа. Неговото преземање на телевизијата коинцидира со периодот кога Зоран Заев ја формираше Владата, кон средината на 2017-та. Како втор сопственик се појавува името на анонимниот српски државјанин Горан Балаќ од Земун, со што се воспоставува унгарско-српско-македонската релација.
Петер Шац е сопственик на компанијата „Рипост“, претставник на унгарскиот капитал во три медиуми во Словенија, вреден два милиона евра. Фирмата е регистрирана во Љубљана, а медиумите кои ги контролира овој медиумски играч од Будимпешта имаат десно ориентирана уредувачка политика и известуваат во корист на Јанез Јанша, иста како таа на ТВ Алфа во Скопје, и на порталите Курир, Лидер и Нетпрес, кои се споменуваат во фокусот на аферата со црни унгарско-руски пари.
Како се поврзани споменатата телевизија, интернет порталите и унгарските пари? Не цела година откако Петер Шац станува сопственик на ТВ Алфа, името на неговата компанија, во малку изменета форма „Рипостарт“, се појави како маркетинг огласувач на Курир, Нетпрес, Република, Лидер и Алфа.
Тогаш се отворија прашања дали истиот унгарски сопственик започнал да ги финансира и порталите, а со тоа да ѝ помогне на ВМРО-ДПМНЕ во медиумската кампања против европските политики на СДСМ. Токму тоа го наведуваат новинарите од Словенија, од порталот „Нецензурирано“ кои пред десетина дена ја обелоденија аферата со црните пари трошени во медиуми – дека вмровските медиуми во Скопје имале задача да го поткопуваат Преспанскиот договор и да дејствуваат против членството во НАТО.
Постои уште еден факт. По влегувањето на Шац во државата, наведените медиуми продолжуваат да бидат силна пропаганда на Груевски, а потоа и на Мицкоски, и да промовираат усогласена уредувачка политика. Во 2018 година, 2,5 милиони евра од Унгарија се депонирани во Македонија преку сметка во „Уникредит Словенија“ од Петер Шац – напишаа словенечките новинари повикувајќи се на банкарски податоци.
Е сега, Петер Шац е во најтесна соработка со Арпад Хабони, сопственикот на „Модерн Медиа“. Оваа компанија е најмоќната во групацијата која во Словенија ја застапува Шац. Тука се појавува улогата на унгарскиот премиер Виктор Орбан. Имено, Хабони е личен советник и стратег за пропаганда на Орбан, а државата, значи Орбан како премиер, целосно ги финансира медиумите на групацијата во која најмоќен е Хабони. За илустрација, во 2017-та, унгарската влада потрошила 40 милиони евра за свои реклами во нејзините медиуми. Истата шема што ја практикуваше Груевски со поткуп и корупција на медиуми.
И така се затвора овој црн медиумско-финансиски триаголник Орбан – Хабони – Шац, а третиов е линкот и во Словенија и во Македонија. Според сето изнесено, најмалку две тези се лажни кога медиумите на Мицкоски се обидуваат да ја извртат вистината за да се оправдаат дека не се фатени во очигледна црна пропаганда. Прво, не може да се обвинува СДСМ дека намерно го темпирал времето за да говори за скандалот кога скандалот го отвори словенечки медиум со релевантно новинарско истражување, а СДСМ го искористи моментот да го повика Јавното обвинителство да отвори истрага и кончено да се утврди со какви пари и за какви цели делуваат вмровските медиуми. Дополнително, СДСМ потсети дека ваква пракса со поткуп и контрола на медиуми постоеше во 11-годишното режимско владеење.
И второ, погрешна е тезата дека СДСМ удира по неподобните новинари за власта. Оваа теза е дури и опасна, а целосно е погрешна. СДСМ не удира, СДСМ алармира, а обвинителството и судството и другите истражни органи треба да постапат. И ова никако не може да е атак кон новинарите, туку кон оние во медиумите кои знаат од каде им стигаат парите, на каков начин и со каква намена, оние кои потоа со таквите пари ги плаќаат новинарите и им нарачуваат што и како да објават.
„Нецензурирано“ пишува дека операцијата со корупцијата во медиумите и нивната контрола со црни пари започнува со средбата во Охрид на 29 септември во 2017 година кога Орбан и Јанша, на официјален работен ручек со Груевски, изразија поддршка за ВМРО-ДПМНЕ пред локалните избори во Македонија. Но, во позадина, тие очигледно веќе правеле други планови. Само три дена претходно, на 26 септември, унгарскиот претприемач Агнес Адамик, го основа „Адинамик Медиа“ во Скопје за да ги купи македонските медиуми. Истиот месец, Петер Шац го лансираше веб-порталот „Рипост“ во Македонија. Оригиналниот сопственик на домејн за пропагандниот портал во Македонија е компанијата „Ш-Шац“ со седиште во Љубљана.
За помалку од една година, унгарските претприемачи станаа официјални сопственици на повеќе од десет електронски, печатени и мрежни медиуми во Македонија. Питер Шатц започна со купување, а од 2018 година Агнес Адамик го водеше бизнисот. Унгарските пари за овие проекти постојано доаѓаа од Словенија – преку сметки во банка „Уникредит“ што ги отворија Шац и Адамик во Љубљана.
После сите овие релации и потврдени сомнителни банкарски трансакции тешко е дека некој може да поверува дека ВМРО-ДПМНЕ не контролира медиуми со сомнителни пари од Будимпешта. Јавното обвинителство има доволно објави во јавноста за да се фати со работа.
