Министреството за информатичко општество и администрација и Македонски телеком по многуте шпекулации за активна 5G мрежа на територија на Северна Македонија деновиве преку соопштенија ги демантираа сите тврдења дека петтата генерација интернет е достапна во нашата земја, како и теориите дека таа е штетна за здравјето на луѓето. Особено фактот дека 5G има некаква врска со корона вирусот.
Редакцијата на Фронтлајн стапи во контакт со раководителот на секторот за контрола и мониторинг на радиофреквенции, Јонче Гроздановски да ни обрајсни околу придобивките и шпекулациите за петтата генерација инернет – 5G.
„Тоа значи дека јонизирачкото зрачење прави промени во структурата на живите организми, додека пак нејонизирачкото, не прави никакви измени во градбата, туку само ја зголемува температурата. На ниво на Скопје ние направивме тестирање на мрежата и според експертската регулатива на ниво на Европа и премерувањето на нивото на зрачење имаме докази дека 5G мрежата е безбедна. Засновано на регулативата, кажуваме и по кој основ е безбедно. На нашата страна на АЕК има детални податоци за тестирањата“, појаснува Гроздановски. 
Според извештајот на АЕК од спроведените тестирања, се заклучува дека кај 5G сигналот не постои сигнал кој е со постојана моќност. Мерењата се направени со интеграција на целиот фреквенциски спектар од 100MHz по средната вредност на јачина на електрично поле. Од мерните резултати, според извештајот, со новата 5G технологија, нејонизирачкото зрачење ќе се зголеми. Во извештајот се вели дека резултатот при ова мерење е на растојание од 160м од базната станица, а вкупното зрачење е помало од 15% од максимално дозволената гранична вредност.
„Тоа се само тешки шпекулации, и вие во вашата новинарска бранша знаете дека секој има слобода да го каже своето мислење, но тоа не значи дека има доказ за тоа. Ако јас кажам дека Водно е Монт Еверест, треба и да го докажам тоа, а немам никаква техничка основа за тоа“, појасни Гроздановски одговарајќи на рашањето зошто се теориите на заговор со кои се обидуваат јавноста да ја убедат дека епидемијата на корона вирус е всушност прикривање на последиците од зрачењето на 5G антените.
5G останува актуелна тема каде фактите и шпекулации се натпреваруваат за што поголем интернет простор и опфаќање на што е можно поглема читателска публика. Фактите се базираат на мерења и тестирања, а теориите на заговор на што поголема креативност во ширење заблуди, дезинформации и лажни вести.
А. Н. С.
