Познатата британска поп пејачка со косовско потекло, Дуа Липа, вчера го разбранува интернетот кога објави слика на своите Инстаграм и Твитер профили од мапа на „голема Албанија“.
Во описот е објаснет зборот „автохтоно“ за кој според внес во речник пишува дека е „(придавка) за жител или за место – домородно наместо население доселено од мигранти или колонизатори“.
au•toch•tho•nous adjective
(of an inhabitant of a place) indigenous rather than descended from migrants or colonists pic.twitter.com/OD9bNmLcZ4— DUA LIPA (@DUALIPA) July 19, 2020
Липа укажува на реториката со која се служат поддржувачи на идејата за „голема Албанија“, според која во една голема албанска држава спаѓаат и териториите од соседните земји каде живее албанско население во Македонија, Грција, Црна Гора, Србија и Косово.
Делот со коментари под објавата почна брзо да се полни со реакции од сите „зафатени страни“, а меѓу конфликтните наративи, многумина посочија дека ваквата слика е провокација и промоција на фашистичка идеологија, со оглед на тоа што идејата за таква држава била актуелна по Втората светска војна.
Според идејата зад контроверзната мапа која и претходно е користена за провокации, стои дека е дефиниција за „албанскиот национализам – групирање на националистички концепти и идеи на етнички албанци, идеи кои биле формирани во 19 век за време на албанското национално будење, кое пак е поврзано и со албанизам и пан-албанизам кои се водат по идејата за креирање на географски проширена албанска држава во која се присоединети балкански територии каде живее доминантно албанско население“.
Многумина на социјалните мрежи го пријавија постот како „навредлив и некоректен“, а со оглед на тоа што пејачката е и амбасадор на УНИЦЕФ, некои корисници на Твитер и Инстаграм побараа и реакции од самата организација.
А. Н. С.
