Во октомври 2019 година поднесов оставка, на барање на опозицијата, по француското ‘не’ за почеток на преговорите. Во меѓувреме, добивме одлука за старт на преговорите со ЕУ, а граѓаните ми дадоа доверба за уште еден мандат, така што нови избори би значеле изневерување на граѓаните. Нема да поднесам оставка, а и нема логика дасе организираат нови избори што би завршиле исто како и неодамнешните, рече Заев.
Премиерот Заев во Дневникот на Сител вели дека Владата има најава дека од Кина уште во текот на овој месец може да бидат испорачани 200.000 вакцини.
Се гради стратегија за продолжување на разговорите со Бугарија, големи се очекувањата од португалското претседателство. Во првичните контакти што ги имале со португалското претседателство, била искажана сериозна намера да се продолжи процесот за проширување што остана од германското претседавање со Унијата.
Владата го објави списокот на компании кои примиле државна помош, а не исплатиле ноемвриска плата. Најмногу се фирми од Скопје, Тетово и Гостивар. Вработуваат од 1 до пет лица, но има и такви кои имаат и по педесетина. Сите ќе бидат блокирани од УЈП доколку во рок од седум дена не ги исплатат платите.
Субвенциите ќе се исплаќаат редовно. Пандемијата и наредната година нема да влијае врз нивната реализација. Средствата за оваа ставка се обезбедени. Наше е да создаваме услови за развој на агро секторот, а земјоделците спокојно да продолжат да произведуваат храна која ни е и тоа како потребна, вели директорот на Платежната агенција, Никица Бачовски. Според него, Владата во изминатиот период ги подмируваше заостанатите долгови од 2012, 2013, 2014, 2015 и 2016 година. Бачовски истакнува дека 2020-та ја заокруживме со исплатени нешто повеќе од 4,9 милијарди денари субвенции и уште безмалку 1,9 милијарди денари поддршка за тутунот.
Учениците од четвртокот се на распуст и на настава (во клупите, пред ИТ-уредите и ТВ-екраните) ќе се вратат на 21 јануари. Уште 15 дена може да се праќаат и предлози, сугестии и забелешки за Нацрт-концепцијата за основно образование поставена на веб-страницата на Министерството за образование и наука. Во наставните програми за општествени науки ќе учествуваат историчари, социолози, географичари, за оние по природни науки – математичари, хемичари, биолози, физичари, рече Царовска. Нема потреба да брзаме, имаме доволно време по пат на дебата да извлечеме најдобар модел кој ќе биде во функција на образовниот процес на учениците, додаде Царовска.
Здружението на оштетени штедачи од Еуростандард банка се надева дека во Македонија ќе нема двојни стандарди.
Според податоците на СЗО во изминатите 24 часа во светот евидентирани се 740.221 нов случај на коронавирус, а во истиот период починале 12.502 лица. Со тоа, вкупниот број на заразени лица се зголеми на 83,32 милиони, а починаа 1,83 милиони пациенти.
Европската агенција за лекови (ЕМА) порача дека за да се постигне целосна заштита треба да се почитува максималниот интервал од 42 дена помеѓу првата и втората доза од вакцината на „Фајзер“ и „Бионтек“.
