пишува: ЕМИЛИЈА ЦЕЛАКОСКА
Го славиме Илинденското востание и Првото заседание на АСНОМ денес, кога голем дел од државата ни е асимилирана од простаклук, невоспитание, глупавост, кои структурата која себеси се нарекува „револуционерна” и се одзива на ВМРО ДПМНЕ, ги шири на секој празник.
Не е дека нешто чека прилика за микрофон, за да фати пак за ‘рбетни приказни. Овојпат вметна и патријархални смрдулки („мажишта и жени”), непристојност кон смртта („расфрлани коски по цела земја”), квазиучени купчиња („математички пресметливо”, „атомска”), застарен хедонистички утилитаризам – директна промоција на тоталитаризам („колективна среќа”) и една безредна, простачки глупава приказна за колку му е мила ЕУ (на Мицкоски). Небаре гледа директно во шут карта од Европската народна партија + некоја црна листа и вика „ма нееее, кој, јас?”
Никаква револуционерна порака, само кукање, обвинување на други како мало дете, смешно правдање на себеси пред меѓународниот фактор и некоја матканица за „колективна среќа”.
Тешко дека толку народ што им изгласал толку пратеници се некакви „револуционери”, напротив. Таа партија направи дел од народот да биде асимилатор на друг, податен дел од народот. Асимилаторскиот мотор се врти околу оглупувувањето, несогледувањето, непланирањето, инаетот, злобата, шовинизмите, патријархалноста и сопствениот апсолутизам пропагиран низ пирамидалната шема на моќи во која се наоѓаат заедно асимилаторите и асимилираните.
Веќе е јавно дека таа асимилаторска-во-простотија зомби-зараза на државава од страна на ВМРО ДПМНЕ го изврте МАНУ во Мануленд на антидржавни „среќни мисли” и му ги пушти на податниот дел од народот опседнато да му павтаат со крилцата во етерот.
Револуционери денес се оние кои се залагаат за еднаквост, вистинско образование, добро здравство, добро судство, безбедност, сигурност, отвореност (како бенефитите што се планираат со Отворен Балкан и ЕУ), сите современи стандарди, технолошко напредување,…
Макар една, една работа да споменеше од овие. Но, не. Нецивилизирани штетници беа и останаа, асимилираа со нецивилизираноста и високо, и ниско во државава, но не сите.
Не сите. Еве, нѐ има, не баш малку што сме ги прозреле. Не се обединувам!
