Виното е еден од нашите најважни стратешки производи и втор најизвезуван во Европската Унија, која е најзначен партнер во трговијата со земјоделско-прехранбени производи на Северна Македонија, истакнува во објава на Фејсбук вицепремиерот Маричиќ.
„Европската комисија веќе ја усвои програмата за ИПАРД 3 во која се доделени 97 милиони евра, европски средства кои ќе се искористат за поддршка на инвестиции во нова земјоделска механизација, изградба на сточарски и живинарски фарми, винарии, млекари, кланици, ладилници, инвестиции во рурален туризам, поддршка за мали бизниси во рурални средини и подобрување на руралната инфраструктура“, потсетува Маричиќ.
Благодарение на континуираната поддршка која ја добиваат нашите земјоделци, нагласува Маричиќ, македонските вина и храна имаат свој препознатлив печат и се почитувани не само на Балканот, туку и низ светот.
„Со членството во Европската Унија, во областа на вино и храна, ќе се овозможи:
Македонските земјоделци да имаат слободен пристап на единствениот пазар на ЕУ.
Северна Македонија да биде дел од Европската економска зона и од единствениот пазар на државите членки на ЕУ, со што се отвораат нови можности за македонските производители.
Да регистрираме и заштитуваме земјоделски производи, кои се веќе регистрирани и заштитени со национални ознаки на потекло, географско потекло или гарантиран традиционален специјалитет.
Пристап до значаен дел од фондовите на ЕУ, кои ќе бидат на располагање за финансирање на руралниот развој, со кои македонските земјоделци ќе имаат можност за полесно модернизирање на земјоделството и производство на многу поквалитетни и поконкурентни производи.
Отворен пазар за произведената македонска храна.
Подобрен квалитет и хигиена на храната, 100% безбедна, сигурна и конкурентна на европскиот пазар.’, потенцира Маричиќ.
Саемот за вино, храна и туризам на Отворен Балкан од 1 до 4 септември во Белград е собирот каде ќе може да се вкусат и искусат автентичните македонски вина и храна. Градејќи партнерства и пријателства, регионално и глобално се поврзуваме за нови соработки, можности и перспективи, нагласува Вицепремиерот.
