На 1 јануари 2023 година, Хрватска го усвои еврото и стана 20-та членка на еврозоната и 27-та членка на европската Шенген зона, зона без контрола на внатрешните граници.
Само неколку недели по транзицијата, во интервју за Еуроњуз хрватскиот премиер Андреј Пленковиќ вели дека единствениот проблем на земјата при воведувањето на еврото е што некои од економските оператори всушност ги имаат кренато цените во контекст на заокружување на цените од куни на евра.
„Од неделата користиме само евра, така што можеме да кажеме дека е многу добро. Единствениот проблем што го имаме е тоа што некои од економските оператори всушност ги кренаа цените во контекст на заокружување на цените од куни на евра, така што сега имаме различни инспекции кои се занимаваат со овие прашања и се обидуваме, како влада, да ги убедиме да ги вратат цените на она што беше на крајот на декември 2022 година“, рече Пленковиќ.
Санкции на ЕУ против Русија
Таканаречената меѓународна заедница, вклучително и Европа и САД, воведоа санкции против Русија за да ја ограничат нејзината способност да ја финансира оваа војна. Но, украинскиот претседател Володимир Зеленски вели дека тоа не е доволно.
На прашањето дали мисли дека Европа прави доволно за да се спротивстави на Русија, Андреј Пленковиќ изјави дека ситуацијата со руската агресија против Украина, која сега трае речиси 11 месеци, е ситуација без преседан на европскиот континент.
„Ние бевме жртва на агресијата на почетокот на деведесеттите, но размерите и последиците на оваа воена агресија против Украина се далеку поголеми“, вели Пленковиќ.
Тој го истакнува единството во Европската унија и степенот на солидарност со Украина, и тоа не само политички, туку и во воена смисла.
„Моето чувство како еден од лидерите на Европскиот совет е дека никогаш досега не сме виделе такво единство на Европската унија, таква решителност, толку јасна и артикулирана осуда на Русија и толкав степен на солидарност со Украина, не само политички, не дипломатски, економски, финансиски, на хуманитарен начин, туку и во воена смисла“.
На прашањето како гледа на крајот на војната во Украина, хрватскиот премиер рече дека како и со секој конфликт, тој ќе заврши на дипломатска маса. Клучната работа во поддршката на Украина е во враќањето на нејзините територии, во зачувувањето на суверенитетот, во зачувувањето на Уставниот поредок. Победничкиот елемент е во целата херојска борба на украинскиот народ и неговата војска.
Неодамнешните тензии на Балканот
Неодамна, се појави загриженост за стабилноста во балканскиот регион, особено во Босна, каде што има огромна хрватска заедница, и ситуацијата меѓу Србија и Косово. Но, хрватскиот премиер е уверен дека овие тензии нема да се прелеат во поширока дестабилизација.
– Никогаш немаше поголем ангажман во Европската унија со регионот на Западен Балкан отколку во текот на 2022 година, рече Андреј Пленковиќ.
„Мислам дека сите мои колеги разбраа дека треба повеќе да се ангажираме, да разговараме со лидерите и да влијаеме на процесот. Србија и Црна Гора преговараат и конечно, Северна Македонија и Албанија ги започнаа пристапните преговори. Босна и Херцеговина доби кандидатски статус и Косово поднесе барање за членство“, вели Пленковиќ и додаде дека она што сега треба да го направат земјите од регионот е да ги намалат тензиите меѓу нив, да ги решат прашањата за функционалноста на државата и демократијата во многу од нив и уште повеќе да ги намалат тензиите кои претходно беа причини за конфликтот.
„Мислам дека со толку висока вклученост и ангажман на европските партнери во институциите на ЕУ, нема да поминеме низ некаков инцидент што може да доведе до дестабилизација. Но, треба да бидеме внимателни, да останеме ангажирани, а сите лидери треба да преземаат сопствена одговорност. Бидејќи колку повеќе земји се стабилни и функционираат, толку побрз ќе биде нивниот пат до Европската унија“, заклучи Пленковиќ.
Подготви: А. Р.
Извор: Еуроњуз
