Пишува: ЈАНЕ ЃОРЃИОСКИ
Велат – чувај Боже од политичари кои не си го менуваат ставот и мислењето и покрај тоа што сите аргументи кои не им биле предочени пред да го формираат првиот став, сега им се дадени на тацна. Тоа се онаков тип на политичари, како Бранко, Љубчо и Грујо кои за да си го заштитат егото, ни ја кочеа државата со празни реторики и стравови последниве 30 години.
Денеска е најавена средба на Ковачевски и Мицкоски. На средбата, треба да се разговара за одлуките кои треба да ги донесат пратениците во Собранието со цел продолжување на европската интеграција.
Премиерот му даде на лидерот на ВМРО-ДПМНЕ да одбира во каков формат сака да биде средбата.
Има две опции пред Мицкоски.
Да се шлепа до крај со национализмот прекрстен од неговите како „патриотизам“, или
Да се фати за сламката за спас со која ќе ја одблокира својата партија за која е повеќе загрижен отколку за државата.
Ковачевски со денешната лидерска средба, му ја дава таа шанса на Мицкоски да се извади од кашата која сам си ја зготви. Ако е умен политичар, Мицкоски ќе ја прифати и искористи.
Компромисот кој е максимумот што може да го изигра Мицкоски е – да поддржи гласање на уставните измени и евентуално да се испазари за одење на предвремени избори.
И двете партии се растрчани на терен небаре изборите се веќе закажани, така што оваа варијанта не е нешто изненадувачка. Ахмети чинам е секогаш спремен за избори. Таравари би прифатил.
Не знам какви му се математиките на Мицкоски, но ако трга од нарачаните анкети, сам ќе се заебе. Мицкоски ако не прифати уставни измени ги губи шансите некогаш да биде тој што ќе состави нова Влада и, тој тоа добро го знае.
Кој е влогот со кој би одел Мицкоски ако се премисли?
Предвремени избори. Може да им мантра Мицкоски на своите дека ете успеал да го победи Ковачевски и да одат на предвремени избори. Па дека Бугарите во Уставот не е којзнае каква работа, ако целта е добивање на власт и, што ти јас знам какви ли им се апетитите на тие околу него.
Сигурен сум и дека тоа – како „победа“, лесно ќе им го продаде на неговите тврдокорни вмровски гласачи, кои како многупати досега слепо ќе ги аминуваат одлуките на вмровскиот лидершип, така да, нема што да се плаши дека ќе ја изгуби поддршката. Можат и со зурли и тапани да слават, нивна работа.
За што се уставните измени.
Промените се во делот на Преамбулата со тоа што се додаваат неколку народи. Во Преамбулата после „… бошњачкиот народ“ се додаваат зборовите „бугарски народ, хрватски народ, црногорски народ, словенечки народ, еврејски народ, египќански народ“
За гласање на овие уставни измени потребно е двотретинско мнозинство во Парламентот.
Можни ли се сопки од Бугарија на нашиот пат кон ЕУ и после евентуално изглесување на измените? Секако дека се можни и очекувани. Но, со кемкање и самокочење никогаш нема да ги надминеме. Нашата цел треба да биде јасна водилка и поголема од можните стравови со кои би се соочиле на тој пат.
Пораките на пријателите од ЕУ и САД, никогаш не биле поконкретни и појасни – сега е моментот да се направи клучниот чекор за патот до членство во ЕУ.
Ќе смогне ли сили Мицкоски да се надмине себеси?
Текстот е личен став на Авторот
