Српскиот претседател Александар Вучиќ и црногорскиот претседател Јаков Мијатовиќ согласни дека посетата на Мијатовиќ на Белград и разговорите се важен чекор во ревитализација и свртување на нова страница во политичките односи меѓу двете држави, јави дописникот на МИА од Белград.
Српскиот претседател на прес конференцијата рече дека со Јаков Милатовиќ разговарале отворено, цивилизирано и нормално, што е предуслов за понатамошно градење доверба, како и дека не сака од никого да бара нешто што не го сака, и да „никому ни на сенка нема да застанеме“.
– Разговорите потврдија дека го делиме мислењето дека зајакнувањето на билатералните врски и поблиската соработка е од огромна заемна корист. Нашите добри односи се важни поради луѓето кои треба да ја почувствуваат користа од она за што разговараме, рече Вучиќ.
Црногорскио претседател изјави дека Црна Гора и Србија ги врзува „заедничка историја и традиционална блискост, заедничка европска цел, што ги обврзува да имаат најдобри можни односи, дури и кога немаме ист став за некои теми, а ги има многу“.
– Ние имаме добри економски односи, но и покрај тоа немаме амбасадори, заеднички гранични премини, платежните трансакции претставуваат сериозна деловна бариера, мешовитите економски комисии не се состанале со години, а заедничка седница на владите на двете земји никогаш не се одржала, посочи Милатовиќ.
„Важно е да не се нарушуваат односите, туку да се подобрат. Се согласивме дека е важно именувањето на амбасадори, за што добив уверување дека Србија набргу ќе го направи тоа, а и Црна Гора по формирањето на владата“, рече Милатовиќ и посочи дека со оваа посета се свртува нова страница во односите меѓу двете земји.
Вучиќ, одговарајќи на новинарско прашање дали со црногорскиот претседател разговарале за екстрадиција на поранешниот претседател на СЦГ Светозар Маровиќ во Црна Гора, изјави дека Србија, како сериозна и одговорна земја, на одговорен начин ќе даде втемелени одговори.
– За мене, нешто друго се поставува како прашање. Зошто во нашите односи секогаш бараме причина да го обвинуваме другиот за непочитување. Дали сте размислувале, дали не боли што Црна Гора го призна нелегалното отцепување на дел од територијата на Република Србија со Косово? Дали нè заболе кога беше протеран нашиот амбасадор во Подгорица, а за тоа немаше валидна причина? Во знак на почит кон господинот Милатовиќ, за 10-12 дена ќе избереме кој ќе биде нашиот нов амбасадор во Подгорица, рече Вучиќ.
Тој на прес конференцијата рече дека со Милатовиќ разговарал и за сите важни теми, од инфраструктурни прашања, изградба на автопатишта, натамошна изградба на железничката пруга, како и натамошно поврзување на енергетски план.
– Разговаравме за најавата од Црна Гора дека има намера да изгради ЛНГ терминал за течен гас во Бар. Србија е заинтересирана да купи дел од тој течен гас, затоа сме подготвени да ги спуштиме цевките кон мерната станица во Бијело Поље, за да можеме да купиме значителни количини гас, рече Вучиќ.
