„Откако СДСМ најави дека ќе предложат Закон за корекција на платите на функционерите и дека парите ќе бидат насочени за антикризни мерки, дежурните ФБ критичари побрзаа со критики за идејата, со констатација „доцна е сега, требаше порано да ви текне!“, реагира на Фејсбук политичкиот аналитичар Ацо Лукароски.
– Нели ќе беше подобро да побараат од опозицијата да даде поддршка за тој закон. прашува Лукароски.
„А можеа и од Максим Димитриевски да побараат да се откаже од платата од 160.000 денари, пошто нели самиот рече дека се срами од неа. Пошто народот гладувал.
А и новинарите можат да го прашаат Мицкоски што мисли за најавениот закон. Или ‘незгодни прашања’ за опозицијата не се дозволени „in our country“?“, реагира Лукароски.
Вицепремиерот за економски прашања Фатмир Битиќи во гостувањето во емисијата „24 Анализа“ најави дека денеска на Влада ќе биде поднесено законско решение за Законот за плати на избрани и именувани лица, за поправедено решение, со кое ќе бидат ослободени дел од средствата за антикризни мерки за најранливите категории граѓани.
– Минатата недела Владата донесе одлука и не задолжи работна група од четири министри за нови антикризни мерки. Утре ќе дадеме и законско решение за Законот за плати на избрани и именувани лица, за поправедено решение, со кое ќе ослободиме дел од средствата за антикризни мерки за најранливите катерогии, бидејќи тоа е клучно во временски периоди кога сите треба да покажеме солидарност, најави синоќа Битиќи.
Тој нагласи и дека со пренамената на буџетот ќе има нов пакет на антикризни мерки од околу 70 милиони евра кои ќе бидат наменети за најранливите категории на граѓани.
– Остануваат денови до обзнанување на новиот пакет мерки, рече Битиќи, и нагласи дека оваа Влада предводена од СДСМ поинаку ги сфаќа ранливите категории и креира мерки таргетирани за нив.
Ј. Ѓ.
