Пишува: НЕНАД ЈОВАНОВИЌ
Има една работа која опасно ме нервира, а за да објаснам, ќе речам вака: јас текстови од 800-900 зборови работам четири, некогаш пет, а некогаш и шест интензивни часа. Тоа, барем оние кои пишуваат, знаат дека е коњска работа. Не, воловска работа.
Друга работа, под текстовите мои, а и под текстовите на моите пријатели од frontline.mk, читам коментари со крволочна омраза, нападите се ад хоминем, нападите се лични, нема ништо за тезите во текстовите. Имате чиста и крволочна омраза.
Понекогаш се прашувам дали коментарите под текстовите се луѓе или купишта од идиоти. Тоа е неверојатно мочуриште, неверојатна бесмислица. Тоа нема ништо позитивно во себе.
И сега веројатно ќе се најде некој навреден од тие купишта коментари на купишта од идиоти. И тие купишта од идиоти се опишуваат себе.
Една од најелементарите работи во коментирањето е тоа дека во суштина вие себеси се опишувате и вашиот внатрешен свет кога коментирате за други луѓе. Тоа е најелементарно за секое коментирање.
Второ, тоа не е VOX POPULI, тоа не е „глас на народот”, притоа, тоа е апстрахирано од одговорност така што, еве, ќе ви дадам пример: кога ќе се разминете на улица, никој од тие идиоти нема храброст в очи да ви каже, а на интернет се страшно силни. Дојди, батице, в очи кажи ми што ти е маката.
Што значи постои некое човечко пристојно однесување на улица, а на коментарите под текстовите напросто е аболирано од одговорност. Вие под коментарите на текстот може да го пцуете авторот, а за текстот ништо не се зборува. Се сомневам дека некој од коментаторите уште и го прочитал самиот текст/колумна/есеј.
Таа толпа изгледа е фотосензитивна, да не речам дека е визуелна: гледа само слика, на сликата има лице, па почнува да плука оти, нели, “није им га мајка родила”. За таквите коментатори имам најголем презир и гадење.
А коментарите под текстовите се чисто мочуриште од луѓе кои се аболирани од одговорност.
Најдобро би било, а сега сонувам, коментаторите под текстовите да се исклучуваат или бришат. Прво, тоа е индуцирана толпа од коментатори кои со самото коментирање – празни и бесмислени идиотштини – ја уништуваат структурата од текстови на авторите.
Коментаторите под текстовите не се никаков VOX POPULI или „глас на народот”. Тоа е сурија од идиоти кои се анимира себе. Точка.
