Руската агресија врз Украина и состојбите на Блискиот Исток и во регионот на Сахел ќе бидат главни теми на денешното заседание на Советот за надворешни работи на ЕУ, со кое ќе претседава високиот претставник на Унијата за надворешна политика и безбедност Жозеп Борел.
Како што соопшти белгиското претседателство со ЕУ, на неколку дена пред втората годишнина од почетокот на руската агресија врз Украина, европските шефови на дипломатии ќе расправаат за актуелната состојба во земјата и за поддршката на Унијата за Киев.
На почетокот на расправата по оваа тема, министрите преку видео конференциски врска ќе имаат неформална размена на мислења со нивниот украински колега Дмитро Кулеба.
На Советот за надворешни работи на ЕУ ќе се разговара и за ситуацијата на Блискиот Исток, вклучително и за случувањата на теренот и во поширокиот регион. На овој дел од заседанието ќе присуствува и високата координаторка на Обединетите нации за хуманитарна помош и реконструкција за Газа, Сигрид Кааг, која ќе има неформална размена со европските министри.
Шефовите на дипломатиите ќе бидат информирани и за најновите случувања во областа на Сахел и ќе разговара за ангажманот на ЕУ во овој африканскиот регион.
Советот за надворешни работи на ЕУ ќе дебатираат и ќе разменат мислења за најновите случувања поврзани со надворешните односи на Унијата, посебно за состојбата во Белорусија.
Заседанието на министрите за надворешни работи на ЕУ ќе почне со неформален појадок со генералниот директор на Меѓународната агенција за атомска енергија, Рафаел Маријано Гроси.
