“Зад бавната дигитализација на државните институции стојат повеќе фактори меѓу кои најистакнати се неусогласеноста на законската рамка, недостаток на ИКТ стратегија и неконзистентност кон користење и промовирање на постоечките решенија како што е Националниот портал за е-услуги кој нуди многу мал број на вистински е-услуги кои пак се користени од многу мал број на граѓани“, вели во изјава за „Фронтлајн“, Мила Јосифовска – Даниловска од Фондација „Метаморфозис“.
Според неа, пред воведување на дигитални услуги од суштинско значење е да се направи рационализација на процесите и процедурите во институциите за да се елиминираат непотребните чекори и тесни грла.
– Тоа често повлекува и нова систематизација на работните места, а институциите тоа не го прават и со тоа се отежнува, а понекогаш и се оневозможува дигитализацијата. Воедно институциите пријавуваат проблеми со недостаток на стручен кадар, особено ИТ кадар, за што како можно решение беше предложена Агенција за дигитализација која што сепак не се реализираше. Неконзистентноста на лидерството, односно промена на 5 министри во 5 години како што е пример со Министерството за информатичко општество и администрација кое е предводник на овие процеси, дополнително го отежнува фокусот кон ефикасна дигитализација на јавната администрација и услугите кои ги нуди за граѓаните, вели Јосифовска – Даниловска.
Исто така, додава таа, не постои унифицирана база на податоци со сите податоци за е-услугите, а не се знае ни колку тие се користат електронски, наспроти на традиционален начин – со физичко присуство.
– Оваа база на податоци е од суштинско значење за институциите да може да следат, оценуваат и планираат создавање на нови е-услуги или да ги подобрат постоечките, да видат кои е-услуги најмалку се користат и да истражуваат, да откријат каде треба да ги интензивираат своите напори или да ја разгледаат стратегијата за нивна промоција, да се види дали има потреба од градење капацитети за целната група да ја користи таа е-услуга, нагласи таа.
Инаку, ревизијата на државниот завод за ревизија открива недоволна посветеност на државните институции кон дигиталната трансформација.
Дестан Јонузи
