По оставката на Весна Дамева од функцијата прв човек на Судскиот совет, опозицијата и власта ги засилија меѓусебните обвинувања.
Оставката на обвинителката Дамева следи по јавните напади и обвинувања од премиерот Христијан Мицкоски и од пратеникот на ВМРО- ДПМНЕ, Антонијо Милошоски.
Како што рече Дамева на прес-конференција, оставката ја донела за да го заштити својот углед, но и фамилијата.
Во образложението, покрај другото, таа наведе дека причините се „немањето слух кај извршната и законодавната власт да се обезбеди брза и ефикасна правда, како и обидите за нарушување на нејзиниот интегритет од страна на високи функционери од власта“.
-Кога нема слух за подобрување на состојбата во судството и истото е опструирано од власта и на разно разни начин и претседателот на Владата и политичарите од владејачката гарнитура, од собраниска говорница или преку прес службата изразуваат негативен став спрема Судскиот совет, спрема членови во Советот, но најпоразително од се е што изразуваат негативен став кон судиите, од кои поголемиот број навистина не го заслужуваат тоа, сметам дека единствено што ми останува е да го заштитам мојот личен интегритет и мирот и спокојството и мое и на моето семејство, поради што поднесувам неотповиклива оставка од функцијата претседател на Судскиот совет на Република Северна Македонија, изјави Дамевска.
Социјалдемократите тврдат дека премиерот Христијан Мицкоски и ВМРО-ДПМНЕ имаат тенденција да развијат партизација на главните институции во државата и преку реформи бараат правосудниот систем да се стави под контрола и да се користи како алатка за партиски цели.
Портпаролката на СДСМ Богданка Кузеска истакна дека „заканите кон судиите и обвинителите сериозно ја загрозуваат независноста на правосудниот систем“.
– Заканите кон судиите и обвинителите сериозно ја загрозуваат независноста на правосудниот систем и тоа има долгорочни последици и за правниот систем и за демократијата. СДСМ стои зад потребата од реформи во правосудството со вклучување на странски експерти и меѓународен мониторинг. Овие реформи треба да се водат по европски стандарди, а не од партиските агенди на Владата, изјави портпаролката на СДСМ, Богданка Кузеска.
Од ВМРО-ДПМНЕ реагираат дека мотото на СДСМ „Без правда нема мир“ го доведе судскиот систем до тотален колапс и нула доверба.
– Надежта за правда, на која се фокусираше СДСМ, заврши неславно со поставување на избрани обвинители и судии во Струмица и Зајас, кои не постапуваат по кривични пријави. Од навивањето на Зоран Заев дека ќе ја донесе правдата во Македонија, остана само клиентелизмот на избраните судии во Струмица и Зајас, кои ги опструираат предметите и не постапуваат. Љупчо Коцевски 6 месеци нема поднесено никаква пријава. Љупчо Коцевски е целосно одговорен за непостапувањето и неуспехот на обвинителите под него, се вели во писмената реакција на ВМРО-ДПМНЕ.
На прашањето дали неотповикливата оставка на поранешниот прв човек на Судскиот совет и се поострите критики на владејачката ВМРО-ДПМНЕ кон државниот јавен обвинител, може да донесе негативни поени за државата, портпаролката на Владата, Марија Митева, рече дека создадената ситуација не претставува притисок врз судиите и обвинителите.
– Негативните поени што ги имавме како држава доаѓаа од немањето правда воопшто и големиот број скандали што се случија. Не ги сметаме за притисок информациите дека ќе имаме навистина моќна борба против состојбите на полето на правдата, потенцираше портпаролката на Владата, Марија Митева.
Митева го повтори ставот на Владата дека „оставката на Дамева беше најсоодветното нешто што можеше да се случи по сите скандали што се случија“.
Опозицијата, обвинува дека ВМРО-ДПМНЕ и премиерот Христијан Мицкоски наместо да спроведува реформи сака да го стави правосудниот систем под нивна контрола и да го користи како алатка за партиски цели.
– Притисокот врз Судскиот совет е дел од широка стратегија на Мицкоски и ДПМНЕ за целосна партизација на институциите и повторно заробување на судството. Процес којшто е дури и побрутален од времето на режимот на Никола Груевски, обвинува опозицијата.
Дестан Јонузи
