Бизнис заедницата бара данокот на додадена вредност од сегашните 18 отсто, да се зголеми на 19,5 отсто, соопшти премиерот Христијан Мицкоски.
– Имаше сега на седницата на Економско – социјалниот совет, да речеме предлог да се зголеми ДДВ – то од страна на бизнис заедницата. Да не биде 18 туку да биде 19,5 проценти. Секакви идеи има. Ние треба да ги ставиме сите аргументи на маса, да направиме една жестока анализа, да видиме што добиваме, што губиме и дури потоа да носиме одлуки, изјави премиерот.
Дали ова беше само вовед, увертира, некакво владино оправдување, основа за владата да има алиби да го предложи ова?
Насир Селими – професор на факултетот за бизнис и економија при Универзитет на Југоисточна Европа вели дека зголемувањето на ДДВ е многу чувствително и доста сложено прашање за економијата на една земја.
– Од една страна, зголемувањето на стапката на ДДВ е точно дека негативно влијае на животниот стандард на потрошувачите, бидејќи стоките и услугите поскапуваат за купувачите и тоа автоматски влијае на намалувањето на благосостојбата на граѓаните на земјата и нивните осиромашување. Но, доколку буџетските приходи не ја покриваат другата страна на државниот буџет, тогаш многу економски активности и други планирани проекти остануваат нереализирани или доколку се реализираат се зголемува буџетскиот дефицит, што не е здраво за економијата на државата, изјави Селими за „Фронтлајн“.
Според него, економијата на Северна Македонија е соочена со голема сума на финансиски трансфери и голема сума се користи за пензискиот фонд.
– Речиси секоја буџетска година, на фондот му недостига 1/3 од сумата за редовна исплата на пензионерите, која се уште е прилично ниска. За да се подобри оваа состојба, во иднина треба да се зголеми реализацијата на капиталните проекти, да се отворат нови работни места, со цел да се зголеми вкупната вредност на БДП на државата. Кај нас ништо или многу малку се случило. Создавањето поголема производна вредност и зголемувањето на услугите ќе го ублажат овој проблем. Треба да се внимава и на инклузивниот принцип, што значи да се има објективен даночен систем и да се вклучат сите бизниси кои функционираат во економијата на државата – да не е селективен данокот, да бидеме пообјективни во оданочувањето на фирмите, а да внимаваат да не им се „одземе здивот“ на претпријатијата кои едвај функционираат, особено на малите и средните претпријатија, анализира професорот.
Данокот на додадена вредност се пресметува и се плаќа во сите фази на производството и трговија, како и во целокупниот услужен секотор.
Миле Бошков од Бизнис заедницата излезе со предлог ДДВ-то да се зголеми од 18 на 19,5% со цел овие пари да им се дадат на општините, да се зголеми стандардот на живеење во општините. Но, Мицкоски засега не го прифаќа предлогот.
Дестан Јонузи
