Војната во Украина продолжува со сите средства, Руската Федерација ја смени тактиката како да манипулира со јавноста и другите засегнати страни низ ЕУ.
ЕУ минатата недела ги осуди активностите на Русија за манипулирање со информации во земјите на ЕУ, како и на Балканот. Официјални претставници на ЕУ постојано го обвинуваат Кремљ за несоодветни дејствија со тенденции за дестабилизација на Европа.
Во соопштението на Дипломатската служба на ЕУ (ЕЕАС) се наведува дека „Чешка, Финска, Естонија, Германија, Франција, Летонија, Литванија, Холандија, Полска, Шведска и Романија ги осудуваат континуираните обиди на Русија да манипулира со информативниот простор на ЕУ“.
Претседателот на СДА Македонија, Џелал Хоџиќ вели дека лажните вести и дезинформациите се само една од многуте алатки преку кои руската политика прави влијание во нашиот регион.
– Сепак руското влијание најмногу е видливо во деструктивните политички процеси, преку кои државите од нашиот регион, вклучително и Северна Македонија, го стопираат и ги одложуваат остварувањето на стратешките цели во евроатланските и европските интеграции. Преку разни политички наративи, хибридни напади, дезинформации, поттикнување на етнички тензии руската политика ги напаѓа демократските процеси и институциите во регионот, а се со цел да го стопира европскиот пат и евроатланските интеграции на државите во регионот, изјави Хоџиќ за Фронтлајн.
Според политичкиот аналитичар Бесим Небиу – руските дезинформации во Балканскиот, регион имаат долга историја и се користат како инструмент за политичко и социјално влијание.
– Балканот е особено ранлив поради историските врски со Русија, етничките и политичките поделби, како и постојаната нестабилност во некои земји. Во последните години, руските медиуми и нивните поддржувачи активно шират наративи кои го поткопуваат евроатлантскиот пат на одредени земји, ја поттикнуваат недовербата во Западот и ја засилуваат проруската пропаганда. Во Србија, на пример, „Спутник Србија“ и други прокремљовски медиуми имаат значително влијание, користејќи носталгија за историските односи и заедничките словенски и православни вредности, вели Небиу во изјава за Фронтлајн.
На онлајн платформите во 2022 година, руската компанија „Агенција за социјален дизајн“ започна кампања за дезинформација наречена „Doppelganger“ – програма што руската влада и агенции ја изградија за да го „заразат“ неруското мислењe.
Операцијата „Doppelganger“, користеше повеќе „клонови“ на автентични медиуми (најмалку 17 медиуми, вклучувајќи ги Bild, The Guardian и RBC Ukraine) и ги таргетираше корисниците со лажни написи, видеа и анкети. За да го постигнат ова, одговорните купија многу домени кои личеа на вистинските медиумски брендови и ги копираа нивните дизајни.
Дестан Јонузи
