Дебатите ширум Европа за можно испраќање мировни сили во Украина преставуваат ризик да се западне во „руската замка“, бидејќи дискусиите за мировна мисија се преуранети во услови кога „Русите не сакаат мир и нема мир“, порача високата претставничка на ЕУ за надворешни работи и безбедносна политика Каја Калас.
– Ако зборуваме за мировници, тогаш запаѓаме во руската замка, затоа што тие не сакаат мир, и нема мир. Ако ги прочитате коментарите на Русите, тие беа прилично среќни. Тие веќе добија се. Прво, треба да извршиме притисок врз (рускиот претседател Владимир) Путин за да се движи кон постигнување мир, изјави Калас во интервју за бриселскиот портал „Еурактив“ во врска со дебатите што се интензивираа во ЕУ по лидерската средба во Париз во понеделникот за испраќање европски мировници во Украина.
Според неа, во сегашните услови фокусот на ЕУ треба да биде на ставен на зајакнување на позицијата на Украина затоа што колку таа ќе биде помоќна на бојното поле, толку ќе биде посилна и на преговарачката маса и ќе биде во состојба да каже „не“ на лош договор.
Во врска со вчерашните разговори на американски и руски претставници во Ријад, Калас оценува дека Американците можат да се среќаваат со кого сакаат, но за да успее некој мировен договор во врска со Украина, во разговорите треба да бидат вклучени и Европејците и Украинците.
– Ако биде постигнат некаков договор со кој не се согласуваме, тогаш тој ќе пропадне, бидејќи нема да се спроведе, смета Калас.
Кога станува збор за „црвените линии“ во преговорите, Калас вели дека е важно да не се прифатат сите главни барања на Русија, бидејќи во спротивно руската агресија „навистина ќе се исплати“ затоа што Русите не само што окупираа одредена територија, туку згора на тоа им се даваат и ветувања од другата страна.
– Мислам дека тоа не е добра тактика за преговори, ниту е силна. Ние, од наша страна, поставивме услови што треба да се исполнат. Но, прво, навистина треба да извршиме притисок врз Русија. Тоа е првиот елемент. Во моментов, ако ги погледнете сликите од Саудиска Арабија, Русите се победници. Нивниот став е: „Сега сите доаѓаат кај нас и ни нудат што сакаме“. Да не запаѓаме во руските стапици, изјави Калас.
На прашање дали ЕУ добила гаранции од САД дека мировните преговори со Русија нема да доведат до „пошироко преструктуирање на безбедносната архитектура на Европа“, Калас вели дека на средбите со американските претставници добивале различни пораки, дури и од исти луѓе на различни состаноци.
– Прашање, се разбира, е како да се сфати сето тоа. Тоа што ни го кажуваат на средбите е дека за такво нешто нема да се договорат. Има многу соговорници од американската страна и треба да се приспособиме на начинот на работа со новата Администрација за да ги сфатиме сите пораки. Американците на секоја средба не уверуваа дека се посветени на Европа и работат заедно со нас. Дека се посветени на НАТО и ја сфаќаат безбедносната загриженост на Европа, додава Калас во интервјуто.
Таа вели дека веќе се појавуваат идеи „да се спакуваат работите“ и да се вратиме на состојба како се да е нормално, но сите мора да сфатат дела со секој лош договор само ќе и се овозможи на Русија да се прегрупира и повторно да нападне.
– Ако направиме паралела со историјата, тогаш сме во ситуацијата од 1938 година. Разликата е во тоа што, за разлика од Чехословачка тогаш, Украина сега реши да се бори. Единственото барање од нас е да ги прераспределиме нашите ресурси и да им помогнеме да се одбранат за да нема Светска војна. Не знам како да го пренесам ова во јавноста на различни земји членки, потенцира Калас.
