Трагичниот случај во Кочани ја налути власта против оние кои размислуваат поинаку од неа за овој случај. Според познавачите на околностите и политичките случувања во државата дел од политичарите од власта, во ова критично време и осетливо за јавноста, се однесуваат и како обвинители и судии.
– За жал, гледаме една голема нервоза на власта во односот кон новинарите уште од првата пресконференција после трагедијата во Кочани. Потоа, гледаме дека дел од политичарите од власта, во ова критично време и осетлива јавност, се однесуваат и како обвинители и судии. Мора да се остави обвинителството да изнесува факти од својата работа. Не смее да се нарушува концептот на поделба на власта. Јавноста има потреба од навремени и точни информации, од релевантни и засегнати институции. Новинарите тука ја имаат главната улога. Институциите и нивните претставници се должни да бидат транспарентни и да дадат точни и навремени одговори на сите прашања од својата област, вели за Фронтлајн, Џелал Хоџиќ – претседател на СДА Македонија.
Според него, скандалозно е да се повикуваат на информативен разговор во МВР новинари од редакциите на “ТВ21” и “Ројтерс”, а кои си ја работеле работата и сакале да известат од собирот на граѓаните.
– Нема демократија без слободни медиуми и новинари кои бараат одговори за прашања од интерес на јавноста. Видовме како нервозно и несоодветно пропагандната машинерија реагираше на текст на Цивил Медиа во кој имаше точна и навремена информација за собирот на граѓаните во Скопје во организација на граѓанската иницијатива „Кој е следен?” Во овие два-три дена видовме нервоза и кај премиерот Мицковски и кај министерот за внатрешни работи Тошковски, во нивните одговори кон новинарите кои поставиле легитимни прашања. Претставниците на институциите се должни достоинствено и со почит кон јавноста да одговараат на прашањата на новинарите, нагласува нашиот соговорник.
Тој, ја поздравува оставката од морални причини на градоначалникот на Кочани, но додава дека, тој беше должен и да излезе во јавноста и да даде одговори на серија на прашања кои ги има јавноста.
– Се отвори и прашањето на начинот на кој политичарите ги посетуваат болните и почитувањето на протоколите кои се важни за здравјето на оние кои се борат за своите животи. Ја видовме и реакцијата на лажните вести во јавноста на сопругата на починат член од бендот. Ова се тешки моменти во општеството, после голема трагедија. Сите повикуваат на сплотеност, но таа сплотеност мора да биде изградена со однесувањето на сите чинители во општеството. А прв пример во тоа треба да биде власта. Институциите имаат обврска да изнесуваат навремени и точни факти, а медиумите кои известуваат треба да се придржуваат на етичките норми предвидени за известување за вакви трагедии, подвлече тој.
Во пожар во дискотека во Кочани животот го загубија 59 млади лица, а над 140 настрадани се згрижени во земјава и странство. По несреќата во Кочани, Владата на Северна Македонија прогласи седумдневна жалост на територија на цела држава.
Двајца новинари на Телевизија 21 и еден новинар на агенцијата „Ројтерс“, државјанин на Република Србија, вчера беа однесени и задржани во полициската станица „Центар“ бидејќи го снимале со дрон јавниот собир на Плоштадот Македонија во Скопје.
Јавниот собир се одржа поради трагедијата во Кочани во која по пожар во дискотеката „Пулс“ загинаа 59 лица. Новинарите се задржани во полициската станица повеќе од час и половина.
Од Министерството за внатрешни работи потврдуваат дека неколку новинари се повикани на разговор бидејќи немале дозвола за снимање со дрон.
Самостојниот синдикат на новинари и медиумски работници (ССНМ) и Здружението на новинари на Македонија (ЗНМ) бараат објаснување од Министерството за внатрешни работи и од Агенцијата за цивилно воздухопловство зошто забраната за користење на дронови била објавена откако започнал јавниот собир во Скопје и зошто новинари биле повикани на информативен разговор иако Скопје не е опфатен со забраната.
Дестан Јонузи
