Потпретседателката на СДСМ, Кристина Костова, во интервју за Фронтлајн остро ја критикува Владата предводена од Христијан Мицкоски, оценувајќи ја како најслаба извршна власт во поновата историја на земјата. Таа посочува дека токму економската несигурност и опаѓачките животни стандарди се највидливиот доказ за неспособноста на актуелното раководство.
„Народот тоне во сиромаштија, платите не се исплаќаат навреме, а Владата одбива да ја зголеми минималната плата на 500 евра – што е минимум за пристоен живот“, вели Костова. Притоа, додава дека економските индикатори укажуваат на пад на индустриското производство и на извозот, зголемени трошоци за живот, а странските инвестиции, според неа, се повлекуваат од земјата.
„Додека граѓаните едвај врзуваат крај со крај, владините функционери трошат народни пари за луксузирање со егзотични производи, скапи ресторани и екскурзии во САД, ОАЕ и Јапонија“, нагласува таа, оценувајќи дека ваквото расипништво не е придружено со никакви реални резултати на надворешен план.
Костова ја коментира и политичката нестабилност во владејачката коалиција, особено по заминувањето на Арбен Таравари од ВЛЕН. „Скандалите и лошиот старт на Владата се директно рефлектирани и во коалициските превирања. Ова е Влада што се занимава самата со себе, наместо да испорачува резултати“, вели таа.
Говорејќи за евроинтеграциите, Костова истакнува дека за време на СДСМ Македонија беше лидер во реформите и се движеше рамо до рамо со Албанија, додека сега, по само десет месеци под ДПМНЕ, е исклучена од сите планови за ново проширување на Европската Унија.
„Македонија е симната од масата. Наместо да преговараме рамноправно со ЕУ, ДПМНЕ ја врати државата во билатерални расправии и свесно ја закочи на европскиот пат“, вели Костова. Според неа, тоа е и суштинската цел на владејачката партија – одржување на хаос и неизвесност, додека соседите напредуваат кон европското семејство.
СДСМ, подвлекува Костова, останува доследен на својата проевропска ориентација и очекува ДПМНЕ јавно да се изјасни за тоа како ќе го деблокира евроинтегративниот процес кој самиот го блокира.
Поврзано:
Интервју со Кристина Костова: Мицкоски сака да владее во хаос, СДСМ се враќа со конкретни решенија
