По парламентарните избори на кои СДСМ забележа пад на поддршката, партијата влезе во процес на внатрешна консолидација. Новото раководство предводено од Венко Филипче најавува зацврстување на позициите, а потпретседателката Кристина Костова во интервју за Фронтлајн вели дека враќањето на довербата кај граѓаните ќе се базира на понуда на конкретни решенија, а не на голо критизерство.
„СДСМ нуди платформа за коалицирање со сите кои ѝ мислат добро на земјава, базирана на социјалдемократски и проевропски вредности. Јасно се дистанцираме од политики на изолација, омраза и неправедна распределба на средства. Црвените линии се веќе видливи – во коалициска смисла, неприфатливи се оние што престојуваат во Белата палата и поддржуваат погубни политики“, вели Костова, упатувајќи на ВМРО-ДПМНЕ.
Таа истакнува дека СДСМ како опозиција нуди решенија за зголемување на минималната плата на 500 евра, намалување на цените на основните производи и деблокирање на евроинтегративниот процес. „Работиме во интерес на државата и граѓаните – тоа ќе биде препознаено и вреднувано“, додава таа.
Во пресрет на локалните избори, фокусот на СДСМ ќе биде враќање на довербата преку теренска стратегија и програмска понуда која ќе биде насочена кон реални потреби на граѓаните. Костова е критична за работењето на општините раководени од ВМРО-ДПМНЕ, оценувајќи го како „девастирачко“.
„Три и пол години ги арчат парите на граѓаните, а не покажаа резултати на локално ниво. Затоа Мицкоски нè задолжи сите нас со милијарда евра, за да им даде финансиска инјекција на дпмневските градоначалници, за тие да можат да изглумат дека нешто правеле. Исто така, во секоја Општина водена од ДПМНЕ, градоначалниците се поврзани во шеми кои укажуваат на криминали и злоупотреби. Мораме да ставиме крај на расипничкото и недомаќинско работење на градоначалниците од редовите на ДПМНЕ’, истакна Костова“.
Приоритет на СДСМ, според Костова, ќе биде понуда на конкретни решенија за секоја општина – од подобрување на животните услови, до борба против корупцијата. Партијата очекува добри резултати таму каде што граѓаните ги препознаваат напорите на СДСМ, но и во средините каде има незадоволство од „фушерајското“ управување на локално ниво.
Поврзано:
Интервју со Кристина Костова: Мицкоски сака да владее во хаос, СДСМ се враќа со конкретни решенија
