Oсудениот за убиство Ацо Боцевски, познат под прекарот Циганот, кој беше во бегство 27 години, е уапсен во грчкиот град Катерини, потврди МВР.
„На 26.05.2025 од страна на грчката полиција сме известени дека го лишиле од слобода Ацо Боцевски кој беше баран со меѓународна потерница по наредба на Основен суд Скопје І од 30.06.1998 година за издржување казна затвор во траење од 15 години за извршено кривично дело по член 123 (убиство) од Кривичниот законик на РСМ“, велат од МВР.
Прекарот „Аце Циганот“ го добил по насилна интервенција во дискотеката „Хард рок“ во Скопје, додека полицијата го бара по меѓународна потерница за убиството на бизнисменот Сеад Ибрахими од Драчево – Скопје. На убиството му претходела неколкуминутна бркотница со автомобил низ скопските улици. Автомобилот „мерцедес“ со кој управувал Ибрахим излетал од патот во близина на зградата на осигурителната компанија „Kjуби“, додека зад него бил Боцевски кој пукал во Ибрахим. Боцевски на 30 јуни 1998 година беше осуден на 15 години затвор, а по затворањето – мистериозно беше ослободен и успеа да ја напушти државата.
Иако беше осуден, Боцевски побегна откако му беше дозволен домашен притвор, и со години успешно го избегнуваше органите на прогонот. За него е распишана една од најстарите меѓународни потерници на МВР.
По бегството, Боцевски извесно време се криеше во Србија, каде и јавно се појавуваше пред телевизиските камери заедно со ликови од белградското подземје за време на бомбардирањето на земјата од НАТО во 1999. Со неговото апсење, се очекува екстрадиција во Македонија, каде треба да ја издржи затворската казна.
Меѓународна потерница е распишана и по поранешниот премиер на Северна Македонија, Никола Груевски, кој е обвинет од Специјалното јавно обвинителство за тешки кривични дела за големи финансиски злоупотреби и злоупотреба на службената положба. Тој успеал на „шверцерски“ начин да ја напушти земјата и да се засолни во Унгарија, земја каде што добил статус на азил.
„Сините“ униформи трагаат по 400 сторители на кривични дела кои успеале да избегнат соочување со правдата. 90% од сторителите на кривично дело се мажи, додека 10% се жени. Министерството за внатрешни работи со меѓународни потерници трага по 103 сторители, додека повеќе од половина од нив, 57, се распишани во последните пет години.
„Се бараат околу 400 лица со меѓународна потрага. Најчесто се гонат за тешки кражби, кражби, помалку за разбојништва, насилство, измами, фалсификување, убиство и многу мал процент за обљуба – околу 5%. Мажи се околу 90%, додека жени околу 10%. Има неколку потерници од 2000 год за кривични дела, „Убиство“, Недозволена трговија со оружје и недозволена трговија со дрога“, велат од МВР.
Според статистиката на МВР, над 90 отсто од бараните со меѓународна потерница имаат македонско државјанство, додека 10 отсто имаат странско државјанство.
Дестан Јонузи
