Опозицијата жестоко реагира на последните потези на власта во однос на изборниот процес, оценувајќи дека се отвораат сериозни можности за манипулации и злоупотреби во корист на владејачката партија. Според нив, однесувањето на Владата и на премиерот Христијан Мицкоски е показател за стравот од губење на голем број гласови на следните избори.
Во јавноста веќе се коментира дека ВМРО-ДПМНЕ изгубилe над 100 илјади гласови во изминатиот период, а дел од анализите и анкетите ја потврдуваат оваа тенденција. Токму поради тоа, опозициските партии тврдат дека власта посегнува по „инструменти“ со кои се загрозува демократијата и се остава простор за изборни нерегуларности.
Пред повеќе месеци Уставниот суд донесе одлука да го укине спорниот дел од Изборниот законик, со кој беше пропишан висок праг на потребни потписи за независните кандидатски листи. Но, Владата реагираше дури по распишувањето на изборите, поднесувајќи предлог-измена во Собранието во последен момент.
Обидот заврши без успех – дел од пратениците на коалицијата ВЛЕН не се појавија, што спречи обезбедување на бадентеровото мнозинство, иако опозициската СДСМ најави дека ќе даде поддршка. Со тоа, измените пропаднаа, а независните листи повторно се доведени во неизвесна состојба.
Според опозицијата, токму ова одолговлекување и несериозниот пристап на Владата покажуваат дека владејачката коалиција намерно остава отворен простор за нерегуларности и манипулации.
Дополнителни реакции предизвика и изјавата на премиерот Мицкоски, кој повторно ја посочи СДСМ и ДУИ како главни виновници за состојбите во државата.
– Дури и една година по преземањето на власта, за сите проблеми виновни се СДСМ и ДУИ – тоа е најдобар доказ за целосна неспособност да се управува со државата, велат од опозицијата.
Премиерот Мицкоски не ја исклучува и можноста да се создаде проблем во изборниот процес со оглед на тоа што независните кандидати можат да учествуваат со само два потписа од граѓани од изборната единица, што пак може да го зголеми бројот на кандидати и да направи гласачкото ливче да биде долго и збунувачко, но како што истакна, ако тоа се случи и изборите бидат неуспешни Владата има уствно и законско право и можност да именува владини повереници во општините.
На ова реагираше СДСМ и истакна дека „во очи на локалните избори, премиерот Христијан Мицкоски отворено најавува суспендирање на Уставот и волјата на граѓаните. Неговата изјава за поставување „владини повереници“ претставува директен напад врз уставниот поредок и граѓанската волја“.
„Ова не е ништо друго освен дрзок обид за узурпација на власта, суспендирање на законите, изборниот процес и заобиколување на граѓанската волја“, истакнуваат од СДСМ.
Опозицијата најавува дека ќе го следи внимателно секој чекор на власта и ќе реагира на секоја можност за злоупотреба на изборниот процес.
– Ова не е само борба за партиски интереси, туку за одбрана на демократијата и правото на граѓаните нивната волја да биде фер и транспарентно претставена, велат од опозицијата.
Политичката сцена во земјава е силно поларизирана во пресрет на изборите. Владејачката партија се соочува со сериозни критики дека не успева да испорача резултати во економијата и во справувањето со корупцијата, додека опозицијата ја обвинува за потези со кои намерно се блокира политичкиот плурализам.
Во ваква атмосфера, изборниот процес станува клучна точка на конфронтација. Прашањето дали ќе се обезбедат фер услови за сите кандидати, особено за независните листи, останува отворено и ќе биде под будно око и на јавноста и на меѓународната заедница.
Дестан Јонузи
