Опозициската СДСМ остро реагира по денешното гласање во Собранието, обвинувајќи ги ВМРО-ДПМНЕ и ЗНАМ дека, како што наведуваат, изгласале „предавство на Македонија“ со резолуција донесена од парламентарното мнозинство.
„ДПМНЕ и ЗНАМ денеска го изгласаа предавството на Македонија. Ја изгласаа предавничката резолуција што самите си ја донесоа во Собранието“, се наведува во соопштението на СДСМ.
Од партијата посочуваат дека 17 декември 2025 година ќе остане запаметен како ден со тешка политичка тежина.
„Денешниот 17 декември 2025 година ќе остане запаметен како денот кога ДПМНЕ и ЗНАМ го заверија предавството на Македонија“, порачуваат од СДСМ.
Во соопштението се критикува и отсуството на лидерот на ВМРО-ДПМНЕ од гласањето.
„Без Христијан Мицкоски, кој ги остави сами пратениците. Побегна дури до Брисел и остави други да го изгласаат неговото предавство на Македонија“, наведуваат од СДСМ.
Партијата отвора и серија прашања поврзани со, како што тврдат, финансиските мотиви зад одлуката.
„Дали сите пратеници на ДПМНЕ-ЗНАМ добија по 1,2 милиони евра, дали добија по 5,3 милиони евра, дали добија по 9 милиони евра за оваа срамна одлука – за ова предавство?“, прашуваат од СДСМ, додавајќи: „Колку пари земавте за предавството на Македонија? Дали на сите ви поделија тендери? Колкав е вашиот дел од шест милијарди евра кредит?“
СДСМ порачува дека нема да остане пасивна.
„СДСМ нема да биде нем посматрач на ова национално предавство. Заедно со граѓаните ќе ги искористиме сите демократски механизми за да се спротивставиме на ова национално и државно предавство“, се вели во соопштението.
Во завршницата, партијата упатува јавен повик за поширок опозициски и граѓански фронт.
„Ги повикуваме сите опозициски партии, здруженија и невладини организации да ни се приклучат во фронтот против криминалната власт. Ги повикуваме и искрените и чесни членови на ДПМНЕ кои ја сакаат Македонија и знаат дека ова што го прави нивното раководство е за пари – да ни се приклучат“, порачуваат од СДСМ.
Соопштението завршува со пораката дека, како што велат од партијата, „борбата започна“ и дека „за предавство ќе има одговорност“.
Собранието со 65 гласа „за“ и пет гласа „против“ попладнево ја донесе „Резолуцијата за осуда на манипулациите на опозицијата и за потврда на политиките против нелегалната миграција“.
Координаторот на пратеничката група на ВМРО-ДПМНЕ, Никола Мицевски во образложението истакна дека парламентарното мнозинство и Владата имаат јасна, доследна и непроменлива политика против нелегалната миграција. Потенцира дека Владата никогаш не побарала, не договорила и нема да дозволи изградба на мигрантски кампови или трајно сместување мигранти на територијата на општините во државата. Со оваа Резолуција, како што посочи, се става крај на сите шпекулации и намерно пласирани невистини кои ги слушаме.
Мицевски нагласи дека Резолуцијата има и јасна превентивна улога – таа испраќа порака дека прашањата поврзани со безбедноста, миграцијата и јавниот мир не смеат да бидат предмет на лаги и политички конструкции.
