Украинскиот претседател Володимир Зеленски изјави дека обезбедувањето силни и правно обврзувачки безбедносни гаранции за Украина ќе биде клучна тема на неговата претстојна средба со американскиот претседател Доналд Трамп, која треба да се одржи во недела во Флорида, пренесува Politico.
Изјавата доаѓа по најновиот масовен руски напад врз Кијив, во кој, според украинските власти, биле лансирани околу 40 ракети и речиси 500 дронови, при што делови од главниот град останале без електрична енергија, а најмалку еден цивил го загубил животот.
Зеленски оцени дека ваквите напади се доказ оти Украина не може да се согласи на прекин на огнот без сериозни меѓународни безбедносни гаранции.
„За нас е исклучително важно да добиеме сигнал дека постои подготвеност за правно обврзувачки безбедносни гаранции. Тоа во најголема мера зависи од претседателот Трамп – прашањето е какви гаранции е подготвен да ѝ даде на Украина“, изјави Зеленски пред новинарите.
Средбата во Флорида се одржува во чувствителен момент, кога Трамп во изминатите недели јавно изрази незадоволство од бавниот напредок во мировните напори за ставање крај на речиси четиригодишната војна. Зеленски најави дека на средбата ќе претстави мировен план од 20 точки, кој меѓу другото предвидува и демилитаризирана зона, а ќе се разговара и за иднината на нуклеарната централа Запорижја и регионот Донбас.
На пат кон Флорида, украинскиот претседател оствари средба со канадскиот премиер Марк Карни во Халифакс, каде двајцата ја осудија најновата руска офанзива.
„Нападот врз Кијив јасно покажува колку е важно да застанеме цврсто покрај Украина во овој тежок момент“, изјави Карни, додавајќи дека праведен и траен мир е можен само доколку Русија покаже вистинска подготвеност.
Зеленски истакна дека нападите врз цивилната инфраструктура покажуваат дека рускиот претседател Владимир Путин нема вистинска намера за мир.
Во меѓувреме, Трамп во изјава за Politico изрази скепса околу мировниот план на Зеленски, нагласувајќи дека без негова согласност договор нема да биде можен.
Украинскиот претседател, исто така, одговори на повиците на Трамп за одржување избори во Украина, истакнувајќи дека таков процес не може да се спроведе во услови на воена состојба и постојана закана од руско мешање.
„Не се држам за функцијата, но избори можат да се одржат само ако бидат безбедни и меѓународно признаени“, изјави Зеленски.
Ј. Ѓ.
