Силните врнежи што непрекинато паѓаа во изминатите 36 часа доведоа до зголемен водостој на реките и поплави во повеќе делови од земјата. Центарот за управување со кризи (ЦУК) информира дека службите се на терен и интервенираат во регионите каде се регистрирани излевања, поплавени домови и блокирани одводни канали.
Поплави во Сарај, зафатени десетици домаќинства
Во Скопскиот регион, најкритично е во Општина Сарај, каде поплавите во селата Буковиќ и Семениште наложија координирана акција на општинските служби, Бригадата за противпожарна заштита на Град Скопје, ЈП Водовод и канализација и Дирекцијата за заштита и спасување. Интервенциите беа насочени кон расчистување на теренот, одводнување и постепена нормализација на состојбата.
Според информациите од терен, над 30 домаќинства биле погодени, а службите реагирале навремено и координирано, при што поплавените објекти биле расчистени.
Директорот на ЦУК, Мухамед Али, присуствуваше синоќа на состанок на Кризниот штаб во Општина Сарај заедно со градоначалникот Мухамед Елмази, каде беше направена детална анализа на состојбата.
„Беше нагласена важноста од брзата реакција, институционалната координација и постојаната комуникација со локалната самоуправа за заштита на граѓаните и нивниот имот. Дефинирани се конкретни чекори за санација на штетите и превентивни мерки за намалување на ризиците во иднина“, информираа од ЦУК.
Излевање на реки и поплавени ниви во Кумановско
Во Кумановскиот регион, во Општина Липково, реката Слупчанка излегла од корито во селото Опае, при што биле зафатени делови од населбата, но најголемиот дел од штетите се однесуваат на поплавено земјоделско земјиште. Излевање е регистрирано и кај Оризаре, без пријавена штета на станбени објекти.
Во Кратово и Крива Паланка, според официјалните информации, засега нема пријави за поплави.
Висок водостој на реките низ западниот дел од земјата
Управата за хидрометеоролошки работи предупредува дека водостојот на реките значително се зголемил поради непрекинатите врнежи во изминатите 24 часа, особено во западните делови од земјата, каде се очекува дополнително зголемување.
Посебен ризик постои во горниот дел од сливот на Вардар, каде се очекува висок водостој и можни заезерувања во Полошката Котлина. Тоа може да доведе до задржување на водата во ниските делови и локални излевања на помалите реки и суводолици во гостиварскиот и тетовскиот регион.
Во Тетово, интензивните врнежи го зголемиле водостојот и создадоа проблеми со одводни канали, а преку 112 е пријавено свлечиште на патниот правец кон Џепчиште.
Најтешките слики, според вонредниот пресек, доаѓаат од Гостивар и околните општини, каде се евидентирани поплавени куќи, подруми и стопански објекти, како и затрупани канали. Во Беловиште се интервенирало за заглавени лица во поплавен објект и тие се безбедно извлечени, а во Форино е пријавено излевање на Вардар со ризик за куќите во близина на мостот кон Тумчевиште. Во истиот контекст се нагласува и проблемот што ретко се кажува директно: ограничените технички ресурси ги прават дел од интервенциите потешки, иако службите се на терен.
Кичево под вода, ризици и во други региони
Зголемени водостоји се регистрирани и во Охридско-Струшкиот регион, особено кај реките Сатеска и Коселска, каде постои ризик од локални излевања.
Во Охрид состојбата е оценета како стабилна, но во Кичево, по излевање на Зајашка река, пријавени се поплавени куќи и дворови на повеќе улици, дополнително од околу 30 семејни куќи се евакуирани деца и повозрасни. Директорот Мухамед Али посочува дека состојбата се следи континуирано во координација со надлежните институции.
Општина Кичево соопшти дека според првичните информации погодени се околу 200 жители, а за оние на кои им е потребно времено згрижување ќе се обезбеди сместување во спортската сала во Иванидол. На терен се екипите на ЈКП „Комуналец“ и Територијалната противпожарна единица, со приоритет да се реагира таму каде што има најголем ризик за луѓето и имотот, а свикан е и кризен штаб што треба континуирано да ја следи состојбата и да ги координира активностите.
Црна Река исто така бележи зголемено ниво, со можност за излевање во Демиркапискиот и Пелагонискиот регион.
Реката Треска е означена како високоризична на критичните точки кај селата Пласница и Лисичани, а дополнително зголемување се очекува и на Кичевска Река.
Предупредување за претпазливост и можни нови врнежи
УХМР предупредува граѓаните да се движат внимателно покрај реки и водотеци, особено во западните делови од земјата. Локално интензивни врнежи се можни и во други региони, што може дополнително да го зголеми ризикот од поплави.
Временската прогноза не најавува брзо подобрување. За денеска се прогнозира променливо облачно време со повремени врнежи, што може да го задржи водостојот висок и да предизвика нови локални излевања.
Состојбата останува под внимателен мониторинг, а надлежните институции продолжуваат со интервенции и превентивни мерки за заштита на населението.
Врнежите повторно ја извадија на површина слабоста на системот кога водата ќе излезе од корито: државата реагира преку теренски екипи и итни интервенции, додека истите места од година во година остануваат меѓу најранливите.
