Повеќе од 1,5 милијарди меѓународни туристи патувале во странство во 2025 година, што претставува глобален раст од 4% и сигнал дека туризмот повторно се приближува до предпандемиските стапки на раст, според најновиот Барометар на светскиот туризам на UN Tourism. Додека Европа останува најпосетуваниот регион со речиси 800 милиони пристигнувања, најголемиот подем доаѓа од нов бран дестинации со силен идентитет и брз раст.
Бразил го предводи растот со зголемување од 37%, по него следуваат Бутан (30%), Египет (20%), Етиопија (15%) и Сејшелите (13%). Експертите велат дека патниците сè повеќе се привлекуваат од автентична култура, впечатливи пејзажи и чувство на откривање — избирајќи места што се уникатни, но сè уште не се пренатрупани.
Египет
Растот од 20% во Египет во голема мера се должи на долгоочекуваното отворање на Големиот египетски музеј во близина на Пирамидите во Гиза.
Тур-операторите промовираат побавни и поавтентични искуства, како пловење по Нил со мали традиционални дрвени едрилици наместо со големи крузери. Сè попопуларни стануваат и активните тури со велосипед и брод, кои нудат поинаков ритам на истражување.
Бразил
Бразил бележи најголем раст во светот, поттикнат од нови меѓународни авионски линии и глобална промоција преку големи спортски настани. Поволниот девизен курс и интересот за природа и велнес привлекуваат нов профил на туристи, вклучително и „свесни“ луксузни патници и семејства што го продолжуваат службениот престој.
Со повеќе од 9.000 километри крајбрежје и огромна внатрешност, земјата ги охрабрува посетителите да истражуваат и надвор од Рио де Жанеиро и Сао Паоло — од амазонската гастрономија на пазарот Вер-о-Пезо во Белем до разновидните културни центри низ државата.
Етиопијa
Етиопија бележи раст од 15%, по повеќегодишен пад поврзан со конфликтот во регионот Тиграј. Обновените летови, новите хотели и платформата Visit Ethiopia придонесоа за враќање на довербата.
Патниците повторно ги откриваат црквите врежани во карпа во Лалибела, наследството на Аксумската империја, средновековниот Гондар и дивиот свет во планините Симиен.
Сејшели
Сејшелите остварија раст од 13%, проширувајќи ја понудата надвор од традиционалниот меден месец. Посетителите уживаат во планинарење, нуркање, креолска кујна и традиционалниот танц моутија, покрај познатите плажи.
Со заштитени 30% од својата морска територија и без приватни плажи, архипелагот се позиционира како лидер во морската заштита и инклузивноста.
Бутан
Растот од 30% во Бутан ја одразува привлечноста на моделот „висока вредност, мал обем“. Ноќната такса за одржлив развој се користи за инфраструктура и услуги за локалното население.
Посетителите бараат подлабоки искуства — приватни благослови со монаси, средби со ткајачи, оброци во оддалечени долини — како и пешачење и мотоциклистички тури низ хималајските пејзажи.
Со закрепнувањето на глобалниот туризам, овие дестинации најавуваат нова ера на патување — фокусирана на култура, поврзаност и свесно истражување наместо на масовен туризам.
Редакција Фронтлајн
