На 29 мај (петок), во Камерната сала на Филхармонија со почеток во 19 часот, ќе се одржи музичко-поетската италијанска вечер насловена „Поетиката на музиката и музикалноста на поезијата: големата италијанска традиција“. Концертот е дел од годинешното издание на „Скопски Брас Фестивал“.
Како солист на труба ќе настапи еден од најреномираните италијански трубачи, Марко Пиеробон, придружуван од ИД Камерниот оркестар под диригентската палка на маестра Дијана Имери Илкоска. На програмата се филмски ремек-дела од легендарните италијански композитори Енио Мориконе и Нино Рота.
Музичкиот дел ќе биде надополнет со поетски сегменти, при што како рецитатор ќе се претстави музикологот и писателка Тина Иванова. Програмата вклучува поезија инспирирана од творештвото на Франциск Асишки и Луиџи Пирандело, како и читање на поемата „Сакај го животот“ од Мајка Тереза. Годинава се одбележуваат 800 години од смртта на Франциск Асишки, чија „Песна на созданијата“ (напишана околу 1224 година) е првиот поетски текст на народен италијански јазик. Воедно, се одбележуваат и 90 години од смртта на нобеловецот Пирандело, чии размисли за љубовта го отвораат тематскиот контекст на настанот.
Настанот е воден од темата „Љубовта и сите нејзини облици“, која е основа на културната програма за 2026 година на Амбасадата на Италија во Скопје. Реализацијата на овој проект е поддржана од Италијанската амбасада во Скопје и Италијанскиот институт за култура во Белград.
