Јубилејното 25. издание на музичкиот фестивал ОФФест, кое од 3 до 6 јуни ќе го претвори Скопје во епицентар на светските музички звуци, ја најавува својата трета фестивалска вечер како патување низ длабоките традиции на Медитеранот преточени во современ израз. На 5 јуни, во Националната опера и балет со почеток во 20:00 часот, на сцената ќе стапне фасцинантниот спој на шпанскиот уметник Раул Рефри и италијанската вокална икона Марија Мазота.
Шпанскиот виртуоз Раул Рефри (гитара, вокал, органа) важи за еден од најиновативните продуценти и музичари во Европа во последната деценија, препознатлив по својата уникатна способност за надминување на традиционалните жанровски граници. Неговото огромно познавање на музичките традиции го постави во центарот на некои од најзначајните современи соработки на светската сцена. Рефри е човекот кој стои зад критички признатите и револуционерни албуми на уметници со силна индивидуалност, меѓу кои светската ѕвезда Розалија, Силвија Перез Круз, Лина, Росио Маркез, Нињо де Елче и Родриго Куевас.
Од друга страна, Марија Мазота (вокал, дајре) е еден од најмоќните и најважните гласови на музичката сцена во италијанскиот регион Апулија. Нејзиниот длабок, емотивен и бескомпромисен начин на интерпретација е редок уметнички дар кој ја позиционира меѓу најблескавите пејачки на глобалната „world music“ сцена денес.
Нивниот заеднички проект се развивал постепено и природно, поттикнат од поканите на неколку значајни европски фестивали, ослободен од какви било комерцијални притисоци. Оваа синергија вроди со плод во нивниот извонреден албум „San Paolo di Galatina“. Во ова издание, Рефри и Мазота на суптилен и моќен начин го реинтерпретираат апулијскиот фолклор, претставувајќи ја Италија од почетокот на 20 век преку религиозни мантри, тешки работнички и нежни приспивни песни. Нивната изведба има јасна цел – да ја пробие темнината и општествената задушеност од минатото, за да достигне физичка слобода и чувство на заедништво, толку потребни во нашето време.
Редакција Фронтлајн
