Невладината ЦИВИЛ, реагира на посетата на рускиот министер за надворешни работи Сергеј Лавров на Самитот на ОБСЕ во Скопје и истакнува дека ЦИВИЛ нема да присуствува на настаните на самитот на ОБСЕ во знак на протест против руската геноцидна агресија и учеството на високиот претставник на државата-терорист.
„На еден од највисоките функционери на мрачниот режим со седиште во Кремљ, кој води геноцидна војна против соседна држава, независна и суверена Украина, му беше дозволено да дојде во главниот град на Северна Македонија за да учествува на самитот на ОБСЕ. ЦИВИЛ изразува најостар протест против доаѓањето на министерот за надворешни работи на руската федерација, Сергеј Лавров и му порачува дека НЕ Е ДОБРЕДОЈДЕН!
ЦИВИЛ – Центар за слобода, како организација за човекови права и слободи, секогаш е на страната на правдата и слободата и се бори против сите форми на агресија, угнетување и кршење на човековите права и слободи.
Поаѓајќи од принципите на почитување на човековите права и слободи, демократијата, правдата, слободата и човековото достоинство, ЦИВИЛ постојано ја изразува својата солидарност со украинскиот народ кој е жртва на руската геноцидна агресија.
Организацијата е на ставот дека одлуката да му се дозволи влез на блискиот соработник на воениот злосторник, Путин, е повеќе од погрешна. На овој начин, нашата земја стана прва членка на НАТО која му дозволи посета на претставникот на рускиот милитантен и злосторнички режим. Ја поздравуваме одлуката на министрите и делегациите на државите кои го откажаа своето учество во официјалната програма на самитот на ОБСЕ. Меѓу нив се британскиот и украинскиот министер за надворешни работи и американскиот државен секретар, како и целосното откажување на учеството на делегациите на Естонија, Летонија и Литванија.
Во знак на протест против руската геноцидна војна против Украина и хибридната војна против демократските земји во Европа и светот, раководството на ЦИВИЛ и членовите на здружената редакција на медиумската платформа на организацијата, донесоа одлука да го откажат своето присуство на сите настани на самитот на ОБСЕ, поради присуството на посочениот претставник на државата терорист.
Лавров НЕ Е ДОБРЕДОЈДЕН! Посета од претставник на рашистичкиот режим е прифатлива само како сведок на обвинителството за ВОЕНИ ЗЛОСТОРСТВА И ГЕНОЦИД“, се наведува во реакцијата од ЦИВИЛ!
#UnitedWithUkraine
#StandWithUkraine
