Европската Унија ја потврдува својата непоколеблива поддршка на Меѓународниот кривичен суд и е решена да ги брани неговите интегритет, универзалност и независност, се наведува во изјавата на високиот претставник на ЕУ за надворешна политика и безбедност Жосеп Борел по повод годишнината од усвојувањето на Римскиот статут на трибуналот на 17 јули 1998 година.
– На 17 јули се одбележува годишнината од усвојувањето на Римскиот статут во 1998 година, кој е основачки договор на Меѓународниот кривичен суд (МКС), единствената постојана меѓународна кривична јурисдикција со универзална вокација. Целта на Римскиот статут е да донесе правда за жртвите на најтешките злосторства што предизвикуваат загриженост во меѓународната заедница како целина, преку обезбедување на ефикасно гонење на нивните сторители, наведува Борел.
Тој потенцира дека ЕУ стои цврсто против какви било обиди за поткопување на рамката на Римскиот статут и на меѓународниот систем на кривичното право, врз кои почиваат последните надежи на многу жртви ширум светот.
– ЕУ ги повикува сите држави да соработуваат со МКС и ги поддржува реформските процеси насочени кон подобрување на ефикасноста на Судот. Европската Унија е глобален лидер во поттикнување на транспарентни и одговорни правосудни институции, промовирање независни, непристрасни и ефикасни правосудни системи и поддршка на пристап до правдата за сите, истакнува високиот претставник на ЕУ.
Борел потсетува и дека од 2000 година Европската унија го поддржува Судот со директно финансирање на активности за информирање, глобални кампањи и проекти на граѓанското општество за промовирање на ратификацијата на Римскиот статут, како и преку програми насочени кон подобрување на националните правосудни системи со обука и градење капацитети. Тој додава дека ЕУ поддржува и иницијативи за транзициска правда и меѓународни правни механизми поврзани со одредени земји, како и дека започна нов проект вреден 21 милион евра насловен „Глобална иницијатива за борба против неказнивоста на меѓународните злосторства: Да функционира правдата!“, чија цел е да го поддржи граѓанското општество ширум светот во придонесот за приматот на меѓународното право и борбата против неказнивоста за најтешките злосторства.
– Европската унија ќе продолжи да се ангажира во напорите за поддршка на граѓанското општество, адвокатите, обвинителите и сите храбри поединци кои работат на полето на меѓународната кривична правда и кои бараат правда за злосторствата на злосторствата. Граѓанското општество и заштитниците на човекови права играат клучна улога во осудувањето на кршењето на човековите права и кршењето на меѓународното хуманитарно право, промовирајќи ја на тој начин одговорноста и правдата. Европската унија ќе продолжи да бара сторителите на најтешките злосторства да одговараат и да се заштитат правата на жртвите. Правдата мора да победи, додава Борел во пораката.
Римскиот статут е договор со кој е основан Меѓународниот кривичен суд, усвоен на дипломатска конференција во Рим на 17 јули 1998 година и кој стапи во сила на 1 јули 2002 година. До февруари 2024 година, Римскиот статус е ратификуван од 124 држави од целиот свет. Со него се регулираат функцијата, надлежноста и структурата на МКС и се утврдени четири основни меѓународни злосторства: геноцид, злосторства против човештвото, воени злосторства и злосторство на агресија, како кривични дела кои не подлежат на никаков рок на застарување.
