Самостојниот синдикат за образование, наука и култура (СОНК) и покрај најaвите на министерката за образование и наука, Весна Јаневска дека нема да имаа зголемување на платите ова годинава, ќе инсистира зголемувањето да биде ова година.
– СОНК очекува продолжување на социјалниот диjалог, односно разговорите со Министерството за Образование и Наука, која што вели дека во буџетот на МОН нема пари за повисоки плати и сега топката се префрлува на повисоко ниво, на ниво на Влада и министерство за Финансии. Така што, ние наредниве денови треба да се вклучиме во преговори со Владата, највeројатно и премиерот ќе се вклучи каде што ќе се обидеме да најдеме заедно решение за да се надмине овој проблем. Имаме простор, имаме време до средината на септември да најдеме решение. Моето увeрување е дека ќе се најде решение, ќе се најдат срества – пари, затоа што СОНК бара тоа што е законски да почитува и плати, изјави за „Фронтлајн“, Јаким Неделков – претседател на СОНК.
За препораката на министерката наставниците да работат со пасија и да чекаат до наредната година за зголемување на платите, Неделков со став дека наставниците барат зголемувањето да биде како што е предвидено со закон.
– Не.. Не.. до наредната година. Министерката изјави да се почека до наредната година, бидејќи во нејзиниот буџет во МОН нема пари, затоа сега ние ќе одиме на повисоко ниво на ниво на државата – од централниот буџет да се обезбедат средства – тоа е нивна работа. Затоа што тоа што ни следува по закон треба да ни го платат, дециден е Неделков.
Во случај да нема договор, тој најави, седница на Советот на СОНК.
„Во случај да нема договор Советот на СОНК ќе држи седница и ќе донесеме одлука. Каква ќе биде одлуката во моментов не може да ви кажам“.
Зголемувањето на платите, односно нивно усогласување со растот на минималната плата, беше закочено поради двојните избори што се одржаа оваа пролет, па очекувањата беа дека новата Влада ќе го заврши процесот со што вработените во образованието требаше да добијат покачување на платите од 12,5 проценти.
Наместо поголеми плати, министерката Јаневска на наставниците и професорите им порача да имале верба во Владата, но и да покажеле пасија во нивното работење.
– Наставниците имаат права како и сите други, им се обраќам на наставниците да имаат верба во Владата, да имаат верба во министерот за образование и да бидат сигурни дека нема да бидат заборавени и дека ќе бидат приоритет. Јас ги молам наставниците, она како што јас ги доживувам во овој момент, да постапуваат со онаа пасија кога се запишале на факултетот кога ја посакале таа професија да ја истераме оваа година со таа нивна волја и желба да придонесат за знаењето на учениците, да придонесат за напредок на државата, а она што им следува, бидејќи и мене и на премиерот ни е добро познато тие секако ќе си го добијат во оној момент кога државата ќе може тоа да го направи, а јас еве како министер грчевито ќе се борам и ќе се борам и на Влада и со нив со преговори и се тоа да биде што е можно повеќе, изјави Јаневска.
Претходно, МОН најави дека следното покачување на платите во образованието ќе биде во март 2025 година кога платите би се зголемиле меѓу 10 и 12 проценти.
Дестан Јонузи
