Универзитетски професори и аналитичари, велат дека власта се обидува да ја претвори кочанската трагедија во битка против своите политички противници. Тие одговорноста за трагедијата, дали од морални или од други причини ја лоцираат во актуелната власт.
Според нив, премиерот Христијан Мицкоски се меша во кочанската трагедија за да избегне лична одговорност, а има и такви кои сметаат дека одговорноста за Кочани е 100% на актуелната власт.
Професорот Гордан Калајџиев вели дека не е многу оптимистичен за тоа како се спроведува истрагата и истакна пет факти на кои го темели својот став.
– Јас не сум толку оптимиста за досегашните истраги како други (редовно го следам Туфегиќ) главно заради пет работи: 1. Многу се меша премиерот лично и ја користи за политички поени а особено да избегне лична морална одговорност; 2. Рано е да се заклучи дали професионално е одработено; 3. Мвр и Јо тераат не многу координирано (мвр скока како прле пред магаре- ЗКП јасно кажува дека за кривични настани пресовите ги води ЈО; 4. Селективност во сомничењата со апсење на претходните функционери и 5. Притвори под притисок на јавноста а не од легални причини и тоа пред медиуми со лисици и сл. што ветуваа дека нема да го прават…, анализира професорот.
Тито Беличанец, универзитетски професор од Правниот факултет во Скопје, коментирајќи ја тешката трагедија во Кочани, децидно наведува дека одговорноста, како што вели, сто проценти е на актуелната власт.
– Лиценцата е обновена и трагичниот пожар се случи за време на владеењето на ВМРО ДПМНЕ! Биш министер и други маргинални лица во притвор. Градоначалникот и други функционери од локалната власт на слобода! Пропадна приказната за тоа кој ја издал лиценцата на дискотеката, зошто била затворена од УЈП во декември 2024, а некој локален моќник дал дозвола да продолжи со работа. Врти сучи, одговорноста е 100% на сегашната локална и централна власт, вели Беличанец.
Поранешниот амбасадор Арсим Зеколи за кочанската трагедијата вели дека и покрај тоа што поминаа четири дена од настанот, премиерот Христијан Мицкоски и министерот за внатрешни работи Панче Тошковски одбиваат да поднесат оставки.
Зеколи и двајцата ги нарече „лица на корупција“.
Во Кочани денеска ќе им биде оддадена последна почит на загинатите во пожарот во ноќниот клуб „Пулс“. Погребната церемонија во Кочани ќе се одржи во 12 часот а со неа ќе чиноначалствува поглаварот на Македонската православна Црква -Охридска архиепископија г.г. Стефан. Од МПЦ – ОА замолуваат за достоинствено и христијанско однесување.
Погребната церемонија ќе се одржи по посебни протоколи, а на и околу местата на погребите ќе бидат распоредени поголем број на лекарски тимови и вода за пиење. На влезната капија на гробиштата ќе стојат свештеници од Кочани кои ќе ги пропуштат родителите со нивните најблиски. Сите останати граѓани се замолуваат да останат надвор од портите на гробиштата и достоинствено, без туркање и загрозување на својата и безбедноста на присутните да оддадат почит на настраданите.
Денеска погребни церемонии ќе се одржат и во Штип, Облешево и Скопје. Во пожарот во дискотеката „Пулс“ загинаа 59 лица, а над 150 се повредени.
Дестан Јонузи
