Пишува: ЈАНЕ ЃОРЃИОСКИ
Додека вмровските, дуиовските и вленовските мачиња и лавчиња се касаат, Скопје, чаирчани, дебармаалци, аеродромци, ѓорчепетровци, киселоводци и другите граѓани се гушат во дивоградби, тонат жедни во ѓубре и смет и се чудат што му направивте на градот. Оние што би требало да носат одлуки се борат на грбот на скопјани, продолжуваат со ганстерски пуцкарања и влегуваат во лични пресметки поради политички и тендерски анимозитет. Во недостиг од институции и визија, добиваме селфи пресметки и фејсбук-драми на ниво на баци-пцуј-блуј.
Фуј!
Од една страна Данела Арсовска, која ја закачија вмровците на градскиот престол, откако се одметна од јатаците ради велат „тендерски несогласувања“, со години ја води метрополата (читај со мало прсте не мрдна) со реторика на независна хероина во постапка, сега одеднаш открива дека Висар Ганиу и Изет Меџити се шампиони на урбаната мафија. Алелуја, Данела!
Од друга страна, Мицкоски – новиот „патриотски премиер“ бара органите на прогонот и правдата да си ја водат постапката и да не се крева многу галама околу ова. Вели имало од се по нешто и дека наскоро ќе сме дознаеле и други детали. Какви детали црни Мицко и зошто наскоро, се прашувате? Па затоашто за да се испеглаат и дотераат политичките калкулации и тендерските љубовчиња секогаш треба време и секогаш се поважни од животот на граѓаните.
Во меѓувреме, скопјани и чаирчани буквално страдаат. Не како метафора – туку со реална жед и мизерија. Тука се и фарсите од типот – „ЈП Водовод и канализација информира дека системот се празни пребрзо поради прекумерна потрошувачка и неефикасна мрежа“.
Додека институциите „постапуваат полека и постепено“, граѓаните „од онаа страна на Вардар“, отвораат чешми од кои не тече ништо и се гушат во ѓубре и шут од шутовите што ги водат, односно, што сами си ги избрале. И општински и градски.
И повторно, никој не презема одговорност. Арсовска тврди дека „полицајците не смеат да примат пријава од неа, ѝ затворале слушалка кога ќе слушнат кој пријавува“, Мицкоски вели „жал ми е што Арсовска добива смртни закани и да оставиме ЈО да си сработи“, а Висар Ганиу и Изет Меџити – наместо објаснување за дивоградбите и неплатените сметки на Општината, обвинуваат за „дестабилизација“ и велат не е така само во Чаир.
Единствената константа драги мои во целата оваа калакурница е – Скопје тоне.
Колку време ќе гледаме како ни го цицаат градот со уцени, со калкулации, додека пред камерите си играат гневни мачки и изморени лавови? И не, не ни е гајле кој кому прв рекол лопов, корумпиран или што ти јас знам како. Ни е гајле што го угушивте градот, што дишеме смрден воздух, водата не тече, кучиња скитници касаат луѓе на плоштад, а ѓубрето станува урбана опрема.
Ако нешто е „дестабилизирано“, тоа е трпението на граѓаните. И ако некој добива поени од ваквиот хаос, тоа не е демократијата, туку криминалот.
А за урбаната култура и упропастената естетика на градот во вакви егзистенционално загрозувачки моменти не останува простор ни да се гукне.
Избори идат. Ќе гукне ли некој?
