Поранешниот премиер Зоран Заев остро реагираше на изјавите на актуелниот премиер Христијан Мицкоски, обвинувајќи го дека преку лаги и клевети се обидува да ја прикрие, како што вели, „катастрофата што ѝ ја нанесува на државата“.
„Небулози, клевети и навреди се методите на Мицкоски со кои сака да се оправда за катастрофата која ѝ ја нанесува на целата држава. Неспособноста да испорача макар и еден единствен резултат во која било сфера од општеството и политиката, залиена со неговата самобендисаност и аздисаност ќе го турне во политичка провалија. Но, ќе мораме да внимаваме да не ни ја повлече и државата со себе во таа провалија,“ напиша Заев на Фејсбук.
Тој најостро ги демантираше тврдењата на Мицкоски за наводни „куферчиња со пари од поранешен премиер од Бугарија“.
„Најостро и категорично ги отфрлам лагите и клеветењата од Мицкоски за наводни ‘куферчиња со пари од поранешен премиер од Бугарија’ како невистини и како очаен обид на неспособниот премиер да го пренасочи вниманието на јавноста од неговите неуспеси кон неговите измислици,“ нагласи Заев.
Тој дополнително потсети на, како што ги нарече, „вистинските експерти за куфери со пари“.
„А, кога сме веќе кај куферите, видовме во снимките што сами си ги пуштија во јавност дека експерти за куфери со пари се токму неговите поддржувачи и финансиери. Оние за кои се фалеше дека му ги плаќале сметките за струја во Белата палата, оние несудени бугарски конзули и осудени криминалци пуштени да се бранат од слобода за да ја напаѓаат опозицијата,“ додаде Заев.
Поврзано:
