Украинските сили вратиле 201 квадратен километар територија од руската контрола во период од среда до недела минатата недела, покажува анализа на Agence France-Presse (AFP), базирана на податоци од американскиот Институт за проучување на војната (ISW).
Според анализата, ова претставува најголемо враќање на територија во толку краток период уште од украинската контраофанзива во јуни 2023 година. Површината што Украина повторно ја презела е речиси еднаква на вкупните територијални придобивки на Русија во текот на целиот декември.
ISW, кој соработува со американскиот аналитички проект Critical Threats Project, наведува дека украинските контранапади веројатно ја искористиле неодамнешната загуба на пристап на руските сили до системот Starlink. Според руски воени блогери, тоа предизвикало сериозни проблеми во комуникацијата, командувањето и надзорот на бојното поле.
Прекините во работата на Starlink антените биле забележани на 5 февруари, откако Илон Маск најавил мерки за спречување на користење на оваа технологија од страна на руските сили. Украинските власти претходно предупредија дека руските единици, особено беспилотните летала, го користеле Starlink за да ги заобиколат системите за електронско попречување и да вршат прецизни напади.
Анализата покажува дека руските сили успеале да остварат територијален напредок само на 9 февруари, додека во останатите денови иницијативата била на украинската страна.
Најголемиот дел од повторно освоената територија се наоѓа околу 80 километри источно од Запорижја, во сектор каде руските сили имале значителен напредок од летото 2025 година.
Според проценките, Русија во средината на февруари контролирала околу 19,5 проценти од украинската територија, во споредба со 18,6 проценти една година претходно. Околу 7 проценти од територијата, вклучувајќи го Крим и делови од Донбас, биле под руска контрола уште пред почетокот на целосната инвазија во февруари 2022 година.
