ChatGPT достигна повеќе од 900 милиони неделно активни корисници, соопшти ОпенАИ во своето најново корпоративно ажурирање, додека и Ројтерс претходно извести дека платформата веќе влезе во силна нова фаза на раст по големиот скок во 2025 година.
Според ОпенАИ, ChatGPTденес е местото „каде што луѓето почнуваат со вештачка интелигенција“, а покрај 900-те милиони неделни корисници, компанијата има и повеќе од 50 милиони претплатници од потрошувачкиот сегмент. Во истото соопштение се наведува дека јануари и февруари 2026 се на пат да бидат најсилните месеци во историјата на компанијата според бројот на нови претплатници.
Дополнителна потврда за обемот на користење доаѓа и од неодамнешна објава на ОпенАИ посветена на образованието, каде компанијата наведува дека 900 милиони луѓе го користат ChatGPT секоја недела, при што најголеми корисници меѓу возрасните групи се луѓето на колеџ-возраст.
Овој раст покажува колку брзо алатките базирани на вештачка интелигенција стануваат секојдневна инфраструктура за работа, учење, пишување, планирање и пребарување информации. Од компанијата велат дека поголемата употреба директно влијае и врз подобрувањето на производот, вклучително и побрзи одговори, поголема сигурност и поконзистентни перформанси.
Ројтерс уште во февруари објави дека ChatGPT ја надминал границата од 400 милиони неделно активни корисници, што значи дека платформата за релативно краток период продолжила со силен раст и речиси се доближила до симболичната бројка од една милијарда неделни корисници.
Технолошките медиуми оценуваат дека овој праг ја зацврстува позицијата на ChatGPT како водечка глобална ВИ платформа за широка публика, во момент кога конкуренцијата меѓу чет-асистентите станува сè поостра, а компаниите се натпреваруваат не само во број на корисници, туку и во претплати, деловни клиенти и интеграции во образованието и работното секојдневие.
Редакција Фронтлајн
