Седница на Собранието на Србија во понеделникот ја одбележа жесток судир меѓу претседателката на парламентот, Ана Брнабиќ, и опозицискиот пратеник Милош Парандиловиќ. Вниманието на јавноста во регионот го привлече невообичаениот одговор на Брнабиќ, која директно коментираше за наводната сексуална ориентација на Парандиловиќ, пренесуваат регионалните медиуми.
Судирот започна кога Парандиловиќ, на кого му беше изречена опомена поради навреди кон пратениците од власта, со висок тон и се обрати на Брнабиќ користејќи го неформалното „ти“. Претседателката на Собранието му одговори на провокацијата со алудирање на неговата сексуална приватност, тема која претходно беше предмет на пишувања во режимските таблоиди.
„И да ви кажам, Милоше, тоа што сме геј и вие и јас, не значи дека можеме да бидеме на ‘ти’. Во ред? Немојте така. Едно е сексуалната ориентација, а друго е дали сме пријатели. Тие две работи не се подразбираат една со друга. Како што се гледа. Така што, да се задржиме ние на ‘вие’. Важи?“, изјави Брнабиќ од собраниската говорница.
Опозицискиот пратеник на мета на таблоидите
Милош Парандиловиќ е претседател на конзервативната партија „Ново лице на Србија“, која поради поддршката на студентските протести често е цел на прорежимските медиуми. Минатата година, таблоидот „Информер“ објави фотографии од неговиот одмор во Црна Гора, тврдејќи дека пратеникот бил таму со својата „поубава половина во машки облик“.
Таблоидите тогаш пишуваа дека Парандиловиќ и неговиот пријател разменувале нежности и разговарале за „насилна промена на власта во Србија“. Парандиловиќ подоцна ги демантираше овие наводи, објаснувајќи дека станува збор за пријател со кого се знае од детството и дека целиот случај е измислен како „геј афера“ за негова политичка дискредитација.
Реакции на ЛГБТ организациите
Од организацијата „Квир збор“ од Белград ја оценија изјавата на Брнабиќ како дел од „бескрупулозна игра“ и злоупотреба на моќта. Според нив, режимот во Србија постојано ги дискредитира политичките противници врз основа на нивната сексуална ориентација, била таа вистинска или не.
„Брнабиќ е погодна за делење геј етикети, правдајќи се со сопственото лезбејство. Таа за тоа добива право да ја има единствената признаена истополова фамилија во државата, додека целта на нејзиното прозивање на другите е тие да бидат политички маргинализирани“, наведуваат од организацијата.
Редакција Фронтлајн
