Премиерот Димитар Ковачевски денеска на Самитот Западен Балкан – ЕУ во Тирана изрази задоволство, што првпат ваков Самит на сите земји членки на ЕУ се одржува во Западен Балкан, во соседна Албанија. Тоа само ја потврдува посветеноста на ЕУ кон проширувањето, соопшти владината прес-служба.
Во овој навистина тежок геополитички момент за Европа, кога се води војна во Украина, ова е многу јасен сигнал дека иднината на Западен Балкан и на сите земји од регионот е во ЕУ, истакна Ковачевски.
Се разговараше многу отворено и тоа се разговараше за оние теми кои што се најважни, најпрвин за енергетската криза и справувањето, повторно беа искажани сите заложби на ЕУ за брза помош за Западен Балкан, преку фондовите кои што се на располагање, што значи дека ние во јануари веќе ќе имаме пристап до 80 милиони евра кои што беа одобрени за справување со енергетската криза, меѓутоа и за инфраструктурните проекти за енергетска транзиција и за енергетска класификација, нагласи премиерот.
Тој истакна дека предмалку го завршил состанок со претседателката на Европската банка за обнова и развој, на кој разговарале за конкретните проекти за поврзување со интерконектори со Грција и со Бугарија, дополнителни два интерконектори, како и за довршување на другите гасоводи кои што се наоѓаат на територијата на Република Северна Македонија, бидејќи веќе е завршен гасоводот кој што се протега од Жидилово до Битола.
Исто така разговаравме и за она што земјите кандидатки за членство во ЕУ го имаат кај себе да го завршат, тука особено разговаравме за владеењето на правото, и за борбата против корупцијата, вие знаете дека на агендата на нашата Влада многу високо е владеењето на правото и борбата против корупцијата и дури и овие денови тоа е главна тема која што ги окупира нашите медиуми, меѓутоа и нашите политички институции, нагласи Ковачевски.
Премиерот изјави дека веќе е разговарано и на ниво на коалициски партнери во врска со донесување на закон за Ветинг првпат во државата, а за тоа разговарал и во Тирана со највисоките претставници на ЕУ, додавајќи дека „многу скоро ќе се најде законско решение пред пратениците во Собранието, за спроведување на постапка за оценување на постојните и на идните носители на функции во однос на нивниот интегритет во насока да се намали можноста за било каква нефункционалност на оние кои што ќе бидат поставени на позиции, пред се на намалување на корупцијата, криминалот и подобрување на управувањето со институциите“, се додава во владиното соопштение.
