Аналитичарот Луан Имери на конференцијата „Различностите – благодаат или проклетство“ во организација на Цивил, се осврна на мултиетничкиот карактер на Шарената револуција. Тој сепак истакна и дека таквата енергија потоа повторно беше нарушена.
„Таман помислив дека ни тргнува со Шарената револуција и мислев дека одиме на добар чекор… Имавме протест на заеднички, со албански и македонски знамиња, јас се организирав со пријатели Албанци, Македонци, Турци да одиме на протест против режимот. Тоа беше супер. Меѓутоа што се случи после тоа? Се случува прослава на ДУИ на Рамковен договор и имаме свиркање на водителката која зборува македонски јазик. Никој не го осуди тоа. Ниту ДУИ го осуди тоа“, рече Имери.
Тој додава дека на дел од неодамнешните протести имаше случувања и кога се скандираше против Албанците
Тоа помина глатко, со мир во куќата, секој се чувствува сигурно во своето стадо, кажа Имери.
Тој е загрижен што интелектуалците не реагираат на говорот на омраза. Според него академската јавност во моментов функционира на линија на помал отпор.
„Со професорот Петар Атанасов инициравме осуда на нападот над Украина од страна на Русија, а многу малку професори од „академската заедница“ се потпишаа на таа иницијатива. Зошто? Не можам да сфатам. Сите сме против војната. Ајде да потпишеме петиција или некаков документ со кој ги повикуваме нашите колеги од Русија, Украина за да можат да направат нешто за да се помириме и да ја прекинеме оваа војна, но немаше иницијатива. Сите некако се затворени, рече Имери, додавајќи дека се прокламира мултиетништво, а сите затвораат сите во сопствените кругови.
