Пишува: ЈАНЕ ЃОРЃИОСКИ
Алелуја?!
Знам, не е уште за алелуја ама денеска Судот во Стразбур ја отфрли жалбата за поништената аболиција која ја донесе изгубениот во превод поранешен претседател Ѓорге Иванов. Со последните политички трзаи, Хорхе тогаш со незаконска аболиција, се обиде да им извлече жива глава на неговите криминални ментори од ВМРО-ДПМНЕ.
Сега и Стразбур им вели „цврц“.
За жал на скептиците и за радост на правдата, државата и поштениот свет, предметите на СЈО и судењата кои произлегоа од нив ќе продолжат, а кримосите од ВМРО-ДПМНЕ че си лежат.
„Судот во Стразбур се изјасни по жалбата поднесена од осуммина граѓани на Република Северна Македонија. Станува збор за аболицијата на Иванов од април 2016 година со која беа помилувани 56 лица осомничени и осудени во повеќе предмети што ги водеше Специјално јавно обвинителство, меѓу кои и поранешниот премиер Никола Груевски, министерот за транспорт и врски во неговата влада Миле Јанакиески, министерката за внатрешни работи Гордана Јанкулоска, поранешниот директор на УЈП Сашо Мијалков и други тогашни државни функционери. Жалбата беше отфрлена од судот, што значи дека предметите на СЈО и судењата кои произлегоа од нив ќе продолжат.“
Што поточно значи ова?
Ова кажува дека: Миле, Горде, братучедот Саше и багра, си го продолжуваат патот по „зелената милја“, а Грујо ќе го крка тоа кога ќе го сменат унгарскиот деспот од претседател. Дотогаш, дури Миле и Горде скапуваат в затвор и со молчење го штитат Пастирот им, тој ќе си лади мадиња во Пешта со атрактивни старлети и ќе си живее тоа што неизживеал во младоста. Да им се чуди човек на умот?!
Сагата ќе си има и продолженија, ич да не се надевате дека правдата сега поглатко ќе оди.
Секирациите со пипците од Мијалков, со тефтерчето од Горде, со лопатите, тендерите, плацевите од Миле и Грујо, со хилтите, лифтовите, со човечињата… има да си ги разбркуваме уште бааѓи време.
Има да си се молиме таму некој совесен бато од судот да ги потера предметите да не застарат. Некоја дадичка од обвинителство да не замижи пред очигледни факти и обвинението да не заврши во ѓубре.
Сè се тоа мафиозни трикови на „верни до гроб“ „ме зезаш“ затскриените слуги на мафијата со кои ќе треба да се избориме. Тоа е цела еден криминална машина за чие раскринкување не се доволни судови, па биле и меѓународни, туку треба сите здраво да запнеме. Да не ги оставиме на мир, да не дишат; да им цапнеме на врат; да не трепнат; да сме мачни досадно жедни за правда. Да врескаме!
Но одлуки како оваа од Стразбур, драги мои, сепак се оние мали победи на кои секој правдољубив човек заслужува да си се израдува, па било тоа и за миг.
Борбата продолжува!
Текстот е личен став на Авторот. Дозволено е преземање на текстот според лиценцата Creative Commons 4.0. Извор: FRONTLINE.
