Илјадници Израелци кои бараат ослободување на заложниците од Газа денеска маршираа до Ерусалим, додека преговарачите се подготвуваат за продолжување на преговорите во Каиро, кои би вклучиле договор за размена на заложници и заробеници со Хамас. Колона демонстранти, предводени од семејствата на заложниците киднапирани од милитантите за време на смртоносниот упад на Хамас во јужен Израел на 7 октомври, се собраа пред изгрејсонце и се упатија по автопатот кон Ерусалим, објави Тајмс оф Израел.
Носејќи израелски знамиња, жолти балони и транспаренти со ликови на заложниците, тие го завршија четиридневниот марш што започна на едно од местата на октомврискиот напад, а им се придружија и други демонстранти на собирот пред резиденцијата на премиерот Бенјамин Нетанјаху.
„Маршираме за да им дадеме поддршка на семејствата на киднапираните, со желба тие наскоро да бидат ослободени и да бидат безбедни. Се молиме за нив со секој наш чекор“, изјави Дени Куперман, еден од демонстрантите.
Мировните преговори за Газа треба да продолжат утре во Каиро.
Американскиот претседател Џо Бајден изрази надеж дека ќе се постигне прекин на огнот за време на муслиманскиот пост Рамазан, кој почнува на 10 март. Десетици заложници би можеле да бидат ослободени доколку се постигне договор.
САД, Египет и Катар посредуваат во разговорите за прекин на огнот од јануари.
Американските власти денеска соопштија дека Израел начелно се согласил на прекин на огнот во војната во Појасот Газа и дека „топката сега е на теренот на Хамас“ за прекинот на огнот да стапи во сила, пишува Политико.
„Има предлог за договор кој е на маса. Израелците горе-долу го прифатија. Шестнеделен прекин на огнот може да започне денеска во Газа доколку Хамас се согласи да ги ослободи заложниците кои се означени како загрозени“, изјави неименуван американски функционер.
Тој додаде дека сега продолжуваат разговорите за да се постигне договор пред почетокот на Рамазан.
Американски официјален претставник, кој сакаше да остане анонимен, истакна дека шестнеделното примирје е замислено како „прва фаза“, со цел да се постигне „нешто потрајно“, особено за зголемување на хуманитарната помош.
Последниот договор доведе до еднонеделно затишје во борбите во ноември минатата недела, при што Хамас ослободи повеќе од 100 заложници, главно жени, тинејџери и деца, додека Израел ослободи три пати повеќе Палестинки и малолетни затвореници.
Речиси пет месеци од почетокот на војната во Газа, 134 заложници остануваат изолирани во крајбрежната енклава, според израелските власти. Меѓу нив има војници и цивили, жени и мажи, едно момче и неговиот помал брат. Милитантите на Хамас убија 1.200 луѓе во јужен Израел и киднапираа 253 во нивниот напад на 7 октомври, соопшти Израел.
Г. Т.
