„Загрижуваат последните постапки во ООН и изјавите на премиерот Мицкоски на Конференцијата на конзервативна политичка акција. Нашата ориентација ќе зависи многу и од тоа како ЕУ ќе се постави во однос на новата американска политика“, вели во изјава за Фронтлајн, Димитар Николовски извршен директор на ЕВРОТИНК, одговорајќи на прашањето: Го напушта ли Северна Македониа правецот кон ЕУ, и дали оди кон „новото нормално“ на Трамп?
– Тешко е да се даде таква квалификација во овој момент, особено што американската ситуација се менува динамично и драстично од ден во ден. Во однос на нашата европска ориентација, сепак загрижуваат последните постапки во ООН и изјавите на премиерот Мицкоски на Конференцијата на конзервативна политичка акција. Нашата ориентација ќе зависи многу и од тоа како ЕУ ќе се постави во однос на новата американска политика. Сметам дека ќе биде најдобро да се обидеме да балансираме помеѓу двете сили, но сегашниот впечаток ми е дека целосно сме свртени кон Трамп, што е секако загрижувачки во однос на нашите стратешки определби, анализира Николовски.
Генералното собрание на Обединетите нации ја усвои резолуција подготвена од Украина и спонзорирана од 27-те членки на Европската унија, со која се осудува воената агресија на Русија врз нејзината соседна земја, изразувајќи поддршка за територијалниот интегритет на Украина и барајќи итно повлекување на руските трупи.
Резолуцијата доби 93 гласа за, 65 воздржани и 18 против. За резолуцијата гласаа сите европски земји, па дури и Србија, со исклучок на Северна Македонија која беше „воздржана“ и Белорусија која гласаше против.
Покрај САД, против оваа резолуција беа и земји како Буркина Фасо, Бурунди, Централноафриканската Република, Демократска Република Конго, Екваторијална Гвинеја, Еритреја, Нигерија, Мали…
Северна Македонија беше коспонзор на друга резолуција поднесена од Соединетите држави, која не доби поддршка од Генералното собрание на ОН. Таа резолуцијата не ја идентификува Русија како земја агресор.
Дестан Јонузи
