Согласно законот, за употреба на пиротехнички средства во затворен простор потребно е одобрение од МВР и потребна е нивна набавка од правни објекти кои имаат лиценца за промет со експлозивни средства.
Сепак, пиротехнички средства, какви што синоќа предизвикаа трагедија во дискотека во Кочани, се користат редовно во затворен простор низ цела држава.
Компаниите со лиценци за продажба на експлозивни средства треба да поминат детални безбедносни проверки од Агенцијата за национална безбедност, се обучуваат како пиротехничари и вршат проценка на ризик пред секоја употреба.
Граѓаните на социјалните мрежи реагираат и прашуваат кој дозволил користење на пиротехнички средства во дискотеката и дали организаторите побарале дозвола за нивна употреба, но и дали МВР извршило контрола и знаело какви средства се користат во клубот.
Министерството за внатрешни работи треба да врши надзор над употребата на пиротехнички средства. Тие издаваат одобренија и обезбедуваат усогласеност преку инспекции. Доколку се утврдат прекршувања – како што се немање одобрение, необучен персонал или небезбедни услови – Министерството може да нареди корективни активности, да забрани употреба на пиротехнички средства или да забрани понатамошно ракување од неквалификувани поединци.
Под истрага треба да биде ноќниот клуб, одговорниот за ракување со пиротехниката, но и самото Министерство за внатрешни работи.
Распишана е централна потерница за четири лица, во врска со пожарот во дискотеката во Кочани, кој избувна синоќа, а во која, според информациите со кои располагаат надлежните до 11:30 часот загинале 59 лица, од кои 35 се идентификувани, а од нив пак 31 се од Кочани, четири се од Штип.
Како што изјави денеска министерот за внатрешни работи Панче Тошковски, според податоците до 12 часот во пожарот се повредени 155 лица, кои се хоспитлизирани во болниците во државата.
Д. Е.
