Професорот Владимир Пивоваров жестоко ја критикуваше работата на Министерството за внатрешни работи, оценувајќи дека институцијата целосно потфрли во својот делокруг на одговорности за трагедијата во Кочани. Во гостувањето во вонредната епизода на „Тешки муабети“, Пивоваров посочи дека постои сериозен недостаток на контрола и координација од страна на МВР во однос на спроведувањето на законите.
– Доколку Министерството за внатрешни работи утврдило неправилности во објектот, требало веднаш да ги извести надлежните институции кои се одговорни за регулирање и надзор. Очигледно има сериозни пропусти, бидејќи објектот не ги исполнува законските услови – нагласи Пивоваров.
Според него, проблемот не е само во недостатокот на редовни инспекции, туку и во системскиот пристап кон ваквите случаи.
– Точно е дека проверките не можат да се вршат секојдневно, но тие мора да бидат редовни и не смеат да зависат исклучиво од пријави. Институциите мора да работат проактивно, а не само по реактивен принцип – додаде професорот.
Овие констатации отвораат сериозни прашања за функционалноста и ефикасноста на системот, особено во делот на инспекцискиот надзор и координацијата меѓу надлежните органи.
