Провладините медиуми, но и власта, излегоа против јавните собири, протестите и студентите по кочанската трагедија каде животот го загубија 59 млади луѓе.
Додека провладините медиуми тивко се обидуваат да го дефокусираат јавното мислење обвинувајќи ги опозициските партии и општествените активисти за граѓанскиот револт, Владата се обидува да сее страв кај граѓаните етикетирајќи ги спонтаните протести и граѓанските организации како дестабилизирачки.
– Морам да истакнам дека како Влада будно ја следиме состојбата. Ја споделуваме загриженоста и разочараноста кај граѓаните на нефункционирањето на системот, но во исто време ги вложуваме сите напори тоа да го промениме. Мора да дозволиме органите на прогонот да си ја завршат истрагата, темелно и правично. Не би сакале да се дозволи попречување од различни мрежи, преку повици за дестабилизација и различни сценарија и било како да наштетат на овој процес, изјави портпаролката на Владата, Марија Митева.
Марјан Забрчанец – граѓански активист побара да се запре, како што истакна, со клеветењето и хушкањето: „вашите лаги нема да го угасат гневот кај граѓаните кои бараат одговорност!“
– Јавно се обраќам до сите медиуми и т.н. “медиуми” кои ги објавија или ќе ги објават ваквите клеветења, навреди, хушкања, етикетирања и дезинформации и барам да го повлечат моето име од објавите и да се извинат за намерното предизвикување и ширење омраза и гнев и тоа во време на национална трагедија. Бидејќи сакаат да се занимаваат со “следење”, сигурен сум дека следачите ќе им ја пренесат следнава порака. Доколку во рок од 24 часа не ги повлечат клеветите, навредите и хушкањата кон мене, ќе се повикам и ќе постапам согласно одредбите од Законот за граѓанска одговорност за навреда и клевета. Барам извинувањето да биде објавено на ист начин и со еднаква видливост како што беа објавени и видливи клеветите и навредите и барам во објавата да бидат објавени фактите подолу, вели Забрчанец.
Новинарот Дритон Зенку во изјава за Фронтлајн смета дека дури и ако организаторите на протестите немаат врска со политички партии, политичките противници ќе најдат некаква поврзаност.
– Во зависност од позицијата, така се креира пропагандната стратегија. Иницијативата Нула е обвинета дека е политичка алатка, бидејќи еден од иницијаторите на иницијативата претходно имал средба со министерот за образование и наука. Обвинетите доаѓаат од опозициски кругови. Друга иницијатива во Скопје е обвинета дека е инструмент на македонската опозиција. Никој не може да негира дека голем дел од медиумите креираат вести врз основа на уредувачки политики кои се директно поврзани со партиски позиции. Дури и ако организаторите на протестите немаат врска со политички партии, политичките противници ќе најдат некаква поврзаност. Зачудувачки е фактот што организаторите на протестот во Тетово се напаѓани од елементи на албанската опозиција, додека организаторите на протестот во Скопје се на мета на кругови на македонската владејачка партија, анализира Зенку.
Петрит Сарачини, новинар и медиумски истражувач вели дека поддржувачите на власта во медиумите и на социјалните мрежи повторно водат оркестрирани хајки против студентите и граѓанските инцијативи што најавуваат собири и протести.
– Повторно се „спружуваат“ медиуми, новинари, граѓански организации и активисти, повторно се прогласува за „шарен“, „платеник“ и „предавник“ – секој што ја критикува истрагата за трагедијата и постапките на „безгрешната“ власт, која бара одговорност секаде, но најмалку во сопствените редови. Овие јалови обиди за бегство од сопствената одговорност не носат ниту сплотување, ниту обединување на целата земја за „промена на системот“. Тие многу повеќе потсетуваат на темните времиња на Груевски и „заробената држава“. И по тие времиња, иако имаше далеку повеќе простор за критикување и протестирање, за жал не се презедоа порешителни чекори за справување со убиствената корупција, криминал и долгогодишна ерозија на системот. Неказнивоста и недостатокот на слух за овие суштински потреби на граѓаните придонесоа во голема мера за катастрофалниот изборен пораз на минатата власт, реагира Сарачини.
Иницијативата „Кој е следен?“, откако во повеќе наврати некои сомнителни медиуми се обидоа да го канализираат и минираат граѓанското организирање и ја сквернават граѓанската иницијатива, излезе со порака до медиумите „Не сме поврзани со ниту една политичка партија, јавно ги осудуваме сите обиди за партизација. Оваа сурова пропаганда нема да нè замолчи.“
Согласно Устав и согласно закон за јавни собири, сите граѓани во Македонија имаат право на јавно собирање заради мирно изразување на мислење и ЈАВЕН ПРОТЕСТ.
Дестан Јонузи
