Универзитетот во Белград апелира до државните власти да создадат услови за продолжување на учебната година, чие редовно завршување е сериозно загрозено, преку дијалог со студентите и исполнување на нивните барања, се нагласува во Платформата за дискусија на високообразовната институција со надлежните органи и институции, јави МИА од Белград.
Таа Платформа беше презентирана и на средбата што делегацијата на Универзитетот во Белград, предводена од ректорот Владан Ѓокиќ, ја имаше со премиерот Ѓуро Мацут на 30 април.
„Обидот за изведување наставни активности против волјата на студентите би претставувал повреда на правото на слободно собирање со цел заштита на јавниот интерес, што е загарантиран со најважните акти на меѓународното право. Покрај тоа, таквата акција би била спротивна на принципите на академскиот интегритет и академската слобода, како и на етичките принципи врз кои се темели нашето општество“, се наведува во документот, објавен и на веб-страницата на Универзитетот.
„Ректорот и деканите немаат мандат од студентите да преговараат за исполнување на студентските барања, ниту за прекин и модификација на блокадата. Универзитетот во Белград ги поддржува првичните студентски барања, но не учествува во организацијата на блокадите, ниту може да ги спречи“, се вели во Платформата потпишана од Владан Ѓокиќ и 31 декан.
Се додава дека Универзитетот и факултетите ја констатирале фактичката состојба создадена со одлуката на студентските пленуми и воедно ги поддржале студентските барања и правото на студентите на мирен протест, собирање и изразување на мислење.
„Ректорот и деканите немаат законски механизми ниту реални можности да ги прекинат блокадите, со оглед на тоа што барањата на студентите не се во надлежност на ректорот и деканот, туку се однесуваат на пошироки општествени фактори“, и се додава дека Министерството за образование, во своето писмо од 25 декември минатата година, ја забележало невозможноста за настава.
Универзитетот во Белград бара притисокот врз него и неговите членови да престане без одлагање, а особено да се суспендира вонредниот надзор врз образовната и финансиската инспекција, како и Државната ревизорска институција врз факултетите.
Исто така, се бара да се запре медиумското потера по ректорот, деканите, студентите и вработените, како и јавното презентирање закани и притисоци насочени кон најстарата и најпочитуваната високообразовна институција во Србија. Барањето е и исплата на средства за сите заостанати плати од буџетските средства во целост.
Во својата платформа, Универзитетот во Белград постави прашања и до Владата на Србија и до Министерството за образование, а првото во низата е дали и кога е планирано да се започне дијалог со студентите кои ги блокираат факултетите за исполнување на нивните барања, со цел да се овозможи продолжување на учебната година.
