Парламентарната група на Левица денеска поднесе кривична пријава против премиерот Христијан Мицкоски за кривично дело „попречување на правдата“ поврзано со трагедијата во Кочани. Обвинението, како што изјави лидерот на Левица, Димитар Апасиев, се однесува на сомневања дека Мицкоски се обидува да влијае врз судските постапки и да заштити функционери блиски до ВМРО-ДПМНЕ.
„Денес пратеничката група на Левица, потпишана од сите шестмина пратеници, поднесе кривична пријава против премиерот Христијан Мицковски за кривично дело ‘Попречување на правдата’ – како кривично дело против правосудниот систем, казниво по член 368, став 5 од Кривичниот законик“, изјави Апасиев на прес-конференција.
Тој посочи дека пријавата се темели на сомневања дека преку понуди за „некои видови корист“ се обидува да се издејствува правна заштита на лица кои имаат врски со криминални структури во Источна Македонија.
„Сметаме дека нудењето некаква корист е со цел, прво, оние актуелни ВМРО-вски функционери кои според неофицијални информации се вклучени во заштита на дрогата и рекетот, да не бидат опфатени. Дел од овие луѓе му биле советници на министерот Панче Тошковски во техничката Влада и имале разработени шеми за испумпување пари од МВР преку бланко полномошни“, изјави Апасиев.
Дополнително, Левица укажува на сериозни недостатоци во самото обвинение поднесено за трагедијата во Кочани.
„Обвинението е криво поставено. Согласно правните начела и мислења на правната фела и видни професори, не можете шеесет луѓе да обвините за исто кривично дело. Ако корупцијата убива, зошто ниту еден од обвинетите не е обвинет за корупција? Сите се обвинети за тешки дела против безбедноста, што носи ризик обвинението да падне пред суд“, предупреди Апасиев.
Левица најавува дека ќе продолжи да ја следи постапката и ќе инсистира на одговорност и целосна истрага за случајот во Кочани.
Премиерот Христијан Мицкоски на прес-конференција одговарајќи на новинарско прашање за најавените кривични пријави рече – доколку постои такво кривично дело Обвинителството да постапи и доколку е одговорен рече дека ќе одговара. Ако не држи кривичната пријава, Мицкоски рече дека очекува од Левица да се извинат, во спротивно се закани со кривична пријава за клевета.
Ј. Ѓ.
