Во Македонија и по повеќе од три децении плурализам, гласањето најчесто се одвива по етничка и партиска линија, наместо според идеолошки вредности и изборни програми. На прашањето на „Фронтлајн“ зошто сè уште е така, комуникологот и експерт за односи со јавност Бојан Кордалов истакна дека причините се длабоко вкоренети во начинот на функционирање на политичките партии и општеството.
„Лично сметам дека секој човек лично избира на кој начин, дали и за кого ќе гласа на секои избори. Од друга страна, за жал, бавно оди преструктуирањето на политичките партии во земјата од т.н. чист етнички застапници во граѓански партии каде луѓето ќе се обединуваат зад одредена визија, идеја, идеологија и концепт надвор од етничките граници.“
Според Кордалов, токму ова бавно менување на политичките структури е клучната причина зошто во земјата сè повеќе се губи идеологијата на партиите.
– Всушност, бавното менување на партиите е и причината зошто се повеќе се губи идеологијата на партиите, а многу често знае да доминира нивниот етничкиот предзнак како пресуден. Исто така, сè уште, но особено порано играа одредени политички структури кои ги злоупотребуваа етничките прашања за задржување или освојување на власта, односно за лично богатење и корупција, изјави Кордалов за Фронтлајн.
Кордалов нагласува дека политичките елити мора конечно да го надминат минатиот век и да ја прифатат реалноста на модерното време.
„Неопходно е политичките структури конечно да излезат од минатиот век и да погледнат дека веќе сме 2025 година, ера на можности за сите, вештачка интелигенција, но, од друга страна, и многу војни и жаришта по светот токму базирани и разгорувани по основ на поделбата по етничка, верска или друга припадност која треба да не обединува во различностите, наместо да не дели.“
Во контекст на европската иднина на земјата, Кордалов вели дека Македонија мора да се определи по кој пат ќе оди – дали ќе биде дел од европското семејство или ќе продолжи да живее во поделби.
„Оттука, како политички елити и како држава имаме можност еднаш засекогаш да избереме кој пат брзо ќе го фатиме. Дали ќе бидеме под покривот на ЕУ и НАТО каде различностите се перципираат како придобивка и каде за да гласате не ви е пресудна етимологијата, односно потеклото на името на кандидатите туку дали имаат минат труд, искуство, дали се чесни и дали можат да направат подобро да се живее во државата.“
Во спротивно, предупредува тој, земјата ризикува да остане заглавена во истиот круг на поделби, иселување и недоверба во институциите.
– И од друга страна, може да продолжиме по патот на делбите кој како што гледате веќе исели половина милион луѓе од Македонија и тоа од сите етникуми, без исклучок, потоа ваквиот пристап уништи доверба во институции, јавно здравство, судство и генерираше таква корупција што во континуитет зема и човечки животи и очигледно е многу тешко после 35 години да се заузда. Секако, крајниот избор кој пат конечно ќе го фатиме е на политичарите, но и на граѓаните, односно на секој од нас, вели нашиот соговорник.
Во пресрет на вториот круг на Локланите избори 2025 година, оваа тема станува сè поактуелна – дали македонските гласачи конечно ќе се насочат кон избор на вредности, политики и визии, или ќе продолжат да гласаат по старите етнички и партиски шеми што ја држат земјата во застој веќе со децении.
Дестан Јонузи
